admin 
मैं ईं बार फिर से
वोट मांगण अयूं छूं
गौं खोळू मा विकास कलू
यन सौं करार कन अयूं छूं
ईं बार फिर वोट मांगण अयूं छूं ।
कखि बोतल मा, त कखि पैसों मा
करार करी अयूं,
स्कूल हॉस्पिटल बणोलु,
यन बनि-बनि का सूपिना
लोखूं आख्यूं मा सजाणूं छूं ।
ईं बार फिर वोट मांगण अयूं छूं ।
कखि सड़क सुविधा
त कखि पांणिऽ
यन भी सबुमा भलीकै बिंगाणू
झूठा सौं-करार करी
फ्येर सीदा मनख्यूं ठगाणूं छूं।
ईं बार फिर वोट मांगण अयूं छूं
रोजगार मीलु ज्वान छोरौं तै
भली कै समझाणू छूं,
सैरा बजार, गौं-खोळू
अपणा नौं का पोस्टर लगाणू छूं।
ईं बार फिर वोट मांगण अयूं छूं
मैं एक बार फिर से
वोट मांगण अयूं छूं
गौं खोळू मा विकास कलू
यन सौं करार कन अयो छूं
ईं बार फिर वोट मांगण अयूं छूं
—–कविता कैंतुरा लुठियाग रूद्रप्रयाग
