गढ़वालौ वैभव प्रोफेसर आरडी गौड़ 

प्रोफेसर आर ० डी ० गौड़  (रामेश्वर दत्त गौड़ )  गढ़वाल का गर्व छन।  गढ़वाल का पादपों तैं अंततर्राष्ट्रीय पटल पर दरशाण  म  प्रोफेसर आर ० डी ० गौड़  को महत्व पूर्ण हाथ च।  मीन गौड़ जी क बारा म जै  भि गौड़ जीक छात्र या सहकर्मी से बात कार तो सब्युं बुलण छौ हमर सौभाग्य छौ जो गौड़ जी हमर गुरु छा या सहकर्मी छा।  मिलनसार , मृदुभाषी प्रोफेसर आर ० डी ० गौड़ तैं गढ़वाल यूनिवर्सिटी म  लाण म  विश्व विद्यालय का प्रोफेसर के पी नौटियाल जी को बड़ो हाथ च।  प्रोफेसर आर ० डी ० गौड़  प्रसिद्ध शोधकर्ता व पुस्तक लेखक छन।

प्रोफेसर आर ० डी ० गौड़   क जन्म सौर (सरा ) , उदयपुर , यमकेश्वर पौड़ी गढ़वाल म 16  मार्च 1945 म ह्वे  छौ।  डाक्टर रामेश्वर दत्त गौड़ की प्रारम्भिक शिक्षा गां  मा  अर  हाइ स्कूल तौंन  श्रद्धानन्द इंटर कॉलेज   भृगुखाल से कार।  इंटरमीडिएट की डिग्री बड़ौत (मेरठ, 1962  ) से करणों उपरान्त स्नातक अर स्नाकोत्तर की उपाधि मेरठ कॉलेज (1966 आगरा यूनिवर्सिटी ) से प्राप्त कार।  1972 म चौधरी चरण सिंह विश्व विद्यालय मेरठ से पराग विज्ञान म पीएचडी  उपाधि प्राप्त कार।

    प्रोफेसर आर ० डी ० गौड़ न  हे ० न ० ब ०  गढ़वाल विश्वविद्यालय म नियुक्ति (1976 ) से पैल मेरठ कॉलेज मेरठ , डी ऐन कॉलेज मेरठ , एमएम कॉलेज मोदी नगर म अध्यापन कार।  प्रोफेसर आर ० डी ० गौड़ सन  2009  तक श्रीनगर गढ़वाल विश्व विद्यालय म भीं भिन्न पदों पर रैन।

     प्रोफेसर आर ० डी ० गौड़ क महत्वपूर्ण योगदान –

   गढ़वाल पादप तै  अंतर्राष्ट्रीय पटल पर दिखवाणो  कार्य सबसे बड़ो महत्वपूर्ण च।

प्रोफेसर आर ० डी ० गौड़ न विश्वविद्यालय  अनुदान , विज्ञान प्रोद्योगिक पर्षद , पर्यावरण व वन मंत्रालय व भारत व प्रांतीय शासन क भौत सी योजनाओं प्रयोजनाओं क सफलतापूर्वक सम्पादन कार।

   प्रोफेसर आर ० डी ० गौड़ न 32 शोधार्थियों क शोध उपाध की पर्वेक्षण (गाइड ) कार.

. प्रोफेसर आर ० डी ० गौड़ क चार शोधपरक ग्रंथ प्रकाशित हुयां  छन व 200 से बिंदी शोध पत्र अंतर्राष्ट्रीय जौर्नलों म प्रकाशित ह्वेन।

   प्रोफेसर आर ० डी ० गौड़ हिंदी म बि  वनस्पति विज्ञान संबंधी लेख प्रकाशित करदान जो सामन्य पाठक शीघ्र समझ जांदन , यूंकि लेखन शैली को यु कमाल च।

               प्रकृति को दार्शनिक प्रोफेसर आर ० डी ० गौड़  न उत्तर भारत , उत्तराखंड म वायु पराग को विस्तृत अन्वेषण से एलर्जी जनित रोगो क निदान म महत्वपूर्ण भूमिका निभायी।

   मूर्धन्य  वैज्ञानिक प्रोफेसर आर ० डी ० गौड़ को गढवाल म पराग संबंधी  शोध से मधुमखी उत्पादन तैं नई सोच मील।

    सतत खोज का समर्थक प्रोफेसर आर ० डी ० गौड़ क गढ़वाल का पादपों क अन्वेषण से आर्थिक वनस्पति तैं  समझण  म बाउट सी नई सोच मील।

   अन्वेषण तैं  धर्म मनण  वळ  प्रेमी प्रोफेसर आर ० डी ० गौड़ क पुस्तक ‘फ्लोरा आव डिस्ट्रिक्ट गढ़वाल -नार्थ वेस्ट हिमालय ‘ म गढ़वाल की 2000 से बिंदी पुष्पीय पादपों क विवरण च जो अंत्तराष्ट्रीय स्तर  पर गढ़वाल को नाम हेतु वांछित फलदायी च।

 पर्यारण प्रेमी प्रोफेसर आर ० डी ० गौड़ न प्रोफेसर वीर सिंह क दगड एक ग्रंथ प्रकाशित कार ‘ रेंज ऐंड इकोसिस्टम  इन द हिमालयन माउंटेन’।   हिमाय म पर्यावरण बचाण म यो ग्रंथ भौत सा विचार दींद।

विज्ञान अन्वेषण को लाभ समाज को सबसे कमजोर मनिख तैं  मिलण  चयेंद का विचारक प्रोफेसर आर ० डी ० गौड़ न लोक जीव विज्ञान या नृवंश जीवविज्ञान  पर द्वी ग्रंथ ऐथनोबिलोलोजी  भाग एक भाग 2  प्रकाशित करिन।

     सतत अन्वेषण हेतु  इंफ्रास्ट्रक्चर सुलभ हूण  चयेंद  का झंडा बुलंद करण  वळ प्रोफेसर आर ० डी ० गौड़ न  हे न ० ब ० गढ़वाल विश्व विद्यालय म अंतर्राष्ट्रीय स्तर को    हर्बेरियम अर लोक पादप संग्रहालय खुलणों गौरव बि  प्राप्त कार।  यी संग्रहालय अंतर्राष्ट्रीय मापदंड पूरा करदन अर यूँ संग्रहालयों तैं पादप संगठनों से मान्यता मिलीं  च।

   सम्मान व सदस्य्ता

 न्यूआर्क विज्ञान अकादमी  का सदस्य

अंतर्राष्ट्रीय प्राकृतिक संरक्षण संघटन  का सदस्य

 उत्तराखंड तकनीक शिक्षा परिषद का सदस्य

राष्ट्रीय मूल्यांकन समिति क सदस्य

भारतीय संपदा पुस्तक प्रकाशन का सदस्य

भारतीय विज्ञान अकादमी क सक्रिय सदस्य

भारतीय विज्ञान अकादमी अर UGC  का फेलोशिप

उत्तराखंड विज्ञान व् तकनीक परिषद न ‘एक्सेलेंस इन साइंस ऐंड  टैक्नोलॉजी ‘ से सम्मन कार।

उच्चस्तरीय शोध हेतु भारतीय पादप वर्गीय संघटन से एच सांटापाउ पुरूस्कार

इंटरनेशनल पब्लिशिंग हाउस द्वारा ‘बेस्ट सिटीजन ‘ पुरूस्कार

प्रत्येक भारतीय प्रोफेसर आर ० डी ० गौड़ का वनस्पति विज्ञान म अन्वेषण  कार्य तैं  सदा याद कारल।

हम सब  स्व ० श्रीमती सावित्री देवी अर स्व०  ईश्वरी दत्त गौड़ पुत्र    प्रोफेसर आर ० डी ० गौड़ की दीर्घ आयु की कामना करदां।