नर-नारायण का भगवान शिव से जुद्ध 

उत्तराखंड संबंधित पौराणिक पात्रों की कहानियां श्रृंखला 

     जब नर अर  नारायण तप म संलग्न छा तबि  राजा दक्ष न कनखळ  म यज्ञ शुरू कौर छौ।  दक्ष न भवन शिव को अपमान हेतु तौं तैं भाग नि दे।  भगवान रूद्र रुष्ट ह्वे  गे  छा अर तौंन यज्ञ विध्वंस कौर दे।  भगवान रूद्र न प्रज्वलित त्रिशूलौ बारबार प्रयोग कार।  स्यु त्रिशूल दक्ष क यज्ञ तैं  ध्वंस कौरी सहसा बद्रिकाश्रम जिना चल अर   नारायण क छाती म लग गे।

     तब महर्षि नारायण न ध्वनि की हुंकार से त्रिशूल तैं  पैथर धकेल दे।  यां से त्रिशूल प्रतिहत ह्वेक शिव जी म ऐ गे।  शंकर तो दक्ष अपमान से क्रोधित छा ही , त्रिशूल पर धक्का से हौर  क्रोधित ह्वे  गेन।  भगवान रुद्रदेव क्रोध म तौं  ऋषियों पर टूट गेन।  शिव आक्रमण को उत्तर म देवात्मा नारायण न शिवजी क गौळ पकड़ अर अटेरण  शुरू कर  दे।  रक्त रुकण  से शिवजी क गौळ  नीलो पड़ गे अर  तबि से शिवजी कुण नीलकंठ बुल्दन।

   इना  नारायण न शिवजी गौळ पकड्यूं  छौ तो नर न मंत्र से आमंत्रित एक सींक छवाड़ जो परशा म परिवर्तित ह्वेक नीलांबर क जिना  वेग से चलणु  चाउ कि भगवन शिव न तै परशु तैं खंडित कार दे तबि शिवजी कुण ”खंडपरशु ‘ बुल्दन।

    नारायण अर  खंड परशु’ मध्य भयंकर युद्ध शुरू ह्वे  गे।  दिव्याश्त्रो व दुयुंक हुंकार से ब्रह्माण्ड विचलित ह्वे  गे।

  तब  ब्रह्मा जी बद्रिकाश्रम म अवतरित ह्वेन  अर दुयुं  तेन परिचित हि  नि कार अपितु यो बि  बिँगाई (समझायी ) कि कें  परिस्थिति म द्वी एक दूसर तैं  नि पछ्याणना छन।

 दुयुं न एक हैंक से क्षमा मांग।  तब शिव अर  विष्णु रूपी नारायण शांत ह्वेन अर एक दुसर से भिंटेन।  तब नारायण न रुद्रदेव से ब्वाल , ” तुमर त्रिशूल को चिन्ह सदा म्यार हृदय स्थल पर अंकित रालो अर श्रीवत्स से प्रसिद्द होलु । तुमर गौळ  पर म्यार हथ का चिन्ह से तुमर नाम ‘श्रीकंठ ; बि  होलु “

 ब्रह्मदेव व शिवजी क बड़रकाश्रम से बौड़नो उपरान्त नर नारायण पुनः ध्यान म संलग्न ह्वे गेन।