द्वी गपोड़ियों की गप्प  

  एक गौँत्या डंग भौत  दूर जात्रा कौरि अपर गांव आयी अर अपर गाँव वळों तै एक ‘सत्य कथा ‘ सुणान लग , ” जात्रा म मीन समोदर म एक इथगा लम्बो जल पोत द्याख कि  जैकी कल्पना अर  व्यख्या अति कठिन च।  एक युवा न जल पोत क धनुष (पोत  क सबसे अगनै क किनारो ) से जात्रा शुरू कार अर मस्तूल तक पौंछद  पौंछद वैक बाळ अर  दाढ़ी झम्म सफेद ह्वे गे छे अर मस्तूल तक पौंछण से पैल इ  सीओ भगवान तै प्यारो ह्वे गे।  “

     गांवक एक युवा काडियो  न डंग की  या कथा सूण  तो बुलण लग़  गे , काका जु मीन देख छौ  वैक समिण  तुमर दिख्युं  कुछ बि नी। “

    युवा काडियो न कथा सुणाइ , ” मि  कुछ दिवस पैलि इन घनघोर जंगळ म ग्यों कि जांक कल्पना मनिख मनिख तो मनिख दिबतौंन बि नि कोरी ह्वेलि।  मीन जंगळ म इथगा बड़ा बड़ा डाळ देखिन जौंक ऊंचाई पता लगाण कैक  बीएस की बात नी।  एक वीर चखुलन पेड़ों क ऊंचाई पता लगाणों प्रयास कार अर  वा चिड़िया दस वर्षों तक पेड़ पर चढ़दी  गे कि  डाळौ चुप्पा म पौंछ साक।  बिचारि वीर चखुली  बीच म ही मोर गे।  “

  डंग तै झूठी कथा से रुषे गे अर बिन रोष दिखायुं  डंग न ब्वाल , ” सरासर  मिथ्या कथा च या।  “

   डंग की बात सूणी  काडिया तैं  क्रोध नि आयी , भितर इ  भितर  हौंस आयी।  काडिया न डंग तै समझायी , ” काका! इखम मिथ्या क्या च ? जथगा लम्बो तुमर जलपोत च वै  जलपोत तै निर्माणौ  कुण इथगा ऊंचा ऊंचा डाळ बि तो प्रयोग ह्वेन जो तुमन नि बतै ।  अर इथ्गा बिंडी  काष्ठ उखन इ ऐन   जै जंगळ की छ्वीं मि  लगाणु छौं।