वीरंगना तीलू रौतेली की लघु कथा 

तीलू रौतेली की तुलना केवल रानी लक्ष्मी ई से नि करे जांद अपितु  महारानी कैकयी , चित्रकोट की चमेली देवी   गोंडवाना की दुर्गावती  , बेलूर की महारानी तपस्विनी   , मेवाड़ की कर्णावती,  धार की द्रौपदी राव , नाना साहेब की दत्तक पुत्री मैना कुमारी दगड़ बि करे जांद।

    उत्तराखंड शासन न तीलू रौतेली क याद म कति पुरुष्कार व योजना बि बणयिं छन।

     तीलू रौतेली क बचपनौ नाम तिलोत्तमा छौ व गढ़वाल देस क राजा पृथ्वीपति शाह क सभाषद भूपसिंह गोरेला रावत की पुत्री छे।  तिलोत्तमा रौतेला क जन्म गुराड़ गाँव म 8 अगस्त 1661 म ह्वे  छौ।  तीलू क बचपन अधिकतर वीरों खाळ को कांडा म बीत।

       13  वर्ष की आयु म तीलू रौतेली क मंगनी इड़ा क भूप सिंह नेगी को पुत्र भवानी नेगी से ह्वे।

 ये ही समय पूर्व से कत्यूरी सेना क आक्रमण गढ़वाळ पर निरंतर हूणा रौंद छा।  कत्युर्यूं  दगड़ युद्ध म तीलू क बूबा जी , तीलू क द्वी भाई अर मंगेतर  युद्ध म बलिदान ह्वे  अर  यां से तीलू क हृदय म बदला की ज्वाला भडकणि  छे।

तब कांडा कौथिग आण  वळ  छे तो तीलू न कौथिग जाणों इच्छा बताई टी तीलू की ब्वै तै द्वी पुत्रों की हत्त्या याद ऐ  गे  अर  ब्वेन न बोली, ” यदि म्यार पुत्र जीवित हूंदा तो अवश्य ही कत्यूरों तै मार भगायी दींदा।  “

     तभी तीलू रौतेली न कत्युर्यूं क विनाश क सौगंध खायी आल  छे।

त ब तीलू न  क्षेत्र का उन्याल , सजवाण , असवाल , डंगवाल , गोर्ला , खूँटी , बंगारी , जसतोड़ा , खंद्वारी , खुगशाल जन क्षत्रिय व ढौंडियाल , पोखरियाल, ध्यानी , बौड़ाई , जोशी , भदोला, सुन्दरियाल जन बामणु  तै अर  अपर द्वी दगड्याणि  बेलू अर  देवली तै शस्त्र अस्त्र से सुसज्जित कार अर  घोषणा कार कि  ये वर्ष कांडा क कौथिग नि  होलु  अपितु  कत्युर्यूं  नाश होलु।

  सबसे पैल  तीलू की सेना न खैरागढ़ पर आक्रमण कार व तख बिटेन कत्युर्यूं  तै भगायी व ये युद्ध म द्वी विश्वस्त  हुतात्मा  ह्वेन  .  तब टकोली खाल अर उमटागढ़ पर अधिकार कार अर विज्यापलक्ष म तख  बूंगी देवी मंदिर की स्थापना कार।

   इख  बिटेन  तीलू का वीर सल्ट  घाटी पौंछि अर  कत्युर्यूं  तै सल्ट  घाटी से भगायी व तख सल्ट मादेव मंदिर की स्थापना कार व मंदिर क पूजा भार संतू  उन्याल  सौंपी।

 यांक  उपरान्त तीलू सेना न भिलण -भौण की ओर  परस्तान कार अर कत्यूरी भायीं , ये युद्ध म तीलू क द्वी शैली बलिदान चढ़ गेन।  विजयोत्साह मनाये जाणु छौ कि कत्यूरियूंन ज्यूंदालगढ़ पर अधिकार कार तो सात वर्ष तक गढ़वळि सेना न तौं  तख बिटेन  भगायी व क्लिनकखाल , बूंगी, बीरोंखाल , चौखुटिया  आदि तै कत्यूरी मुक्त करणी राई।  अंत म कत्यूरी सेना न संधि प्रस्ताव धार।

    विजय पताका फहराणों  उपरान्त तीलू व वींक सेना न भूप सिंह क तर्पण कार व आराम करण  लग व तल्ला कांडा शविर निकट पूर्वी नयार म तीलू नयाणो  गे  व एक कापुरुष कत्यूरी सैनिक न पैथर से तीलू पर वार कार।  तीलू अस्त्र हीन  छे तो प्राणरक्षा हेतु कुछ नि  कौर साक , तखमी तीलू रौतेली न बलिदान म प्राण त्यागीन।  वीस वर्ष की आयु म तीलू न वीरगति प्राप्त कार।

     तीलू की याद म असंख्य लोक गीत प्रसिद्ध ह्वेन  व  आधुनिक कवियों द्वारा बि गीत लिखे गेन।  खंड काव्य लिखे गेन।