admin 
भेड़िया की भेड़ियाण से छ्वीं (मुल मुल हंसौण्या लघु स्वांग )
(लघु नाटिका श्रृंखला )
नौटंकीबाज – भीष्म कुकरेती
मिसेज भेड़िया – मीम एक आश्चर्य वळि वस्तु लौं।
मिस्टर भेड़िया – क्या तू क्वी मिरग पकड़ी ल्है ?
मिसेज भेड़िया -मिरग से बि बढ़िया। मि तैं जंगळ म एक पृत्यगीत बच्चा मील।
मिस्टर भेड़िया – हूं ! मीन त समज मिरग लै। बच्चा म नामात्रा मांश हूंद। अर कोमलतम मांस।
मिसेज भेड़िया -ह्यां तन नि बुलण। हम भेड़ियों म परित्यागित बच्चा पळणो संस्कृति च।
मिस्टर भेड़िया – हाँ किन्तु यि मनिख अंत म मनिख हि बणदो अर छोड़ि चल जांदन।
मिसेज भेड़िया – पर यु बच्चा निरीह च , हीन च। वै तैं हमारी आवश्यकता च।
मिस्टर भेड़िया – मनिख कबि हमर नि ह्वे सकद।
मिसेज भेड़िया – याद च एक बार हमन पैल बि द्वी बच्चा बर्मा अर कर्मा । . वु द्वी बड़ मयळ नौना छा।
मिस्टर भेड़िया – हाँ पर वो द्वी मंद बुद्धि क छा। याद च वो मंद बुद्धि बर्मा। शिकार करद शिकार का समिण उल्टा ह्वे गे छा। अर शिकार तै समजाणु कि
मिसेज भेड़िया -पर वो कुछ नया करणै प्रयत्न करणु छौ। बड़ो सीधो छौ, मयळ !
मिस्टर भेड़िया – हाँ किन्तु एक बार वैन बपईया गाडी बणाइ अर कति दिन तक हम तैं खैंचण पोड़। तैन हम तैं बिवास कार कि हम मांस भूनी खवां।
मिसेज भेड़िया – बिचारो हम तै मनिख बणाणो कथगा प्रयत्न करदो छौ।
मिस्टर भेड़िया -अरे हमन भूखी मर जाण छौ। अब हम तै विवस करण लग गे कि माच मारो। अब भेड़िया भून्युं मांश व माछ खाला तो जल्दी ही स्वर्ग नि जाला।
मिसेज भेड़िया – बिचारो चांदो छौ कि हम सब भेड़िया मनुष्य की आदत का आदी ह्वे जवां अर मनिखों बीच रवां।
मिस्टर भेड़िया – भल ह्वाई जु हमन मारि देन दुयुं तैं। निथर तौन त भेड़िया इ ना पशु जाति हि निबटाई याल छे।
मिसेज भेड़िया – कर्मा तो हौर बि भलो छौ।
मिस्टर भेड़िया – अरे ख़ाक भल छौ। तै कर्मा तैं ल्वै देखि उल्टी हूण लग जांदो छौ। हम तैं बिलकुल शकाहारी अर अहिंसा वादी बणनो शिक्षा दीन्दो छौ। भल ह्वाइ हमन त ना पर एक बागन तैक शकाहारी भोजन कारी अहिंसा पर चलो भाषण सूणी अर रूसेक तै मारि दे ।
सर्वाधिकार @ भीष्म कुकरेती २०२२
