जब भगवान न् मनिखाक कमी दूर कार 

  मनिख निर्माण कौरि  भगवान आनंद भवन म आनंद से से गेन।  भगवान पुळेणा छा कि मीन मनिख म वो जोड़ दे जो सामान्य पशुओं म नी उतना।  भगवान न अपर कृति मनिख म मन अर  बुद्धि इथगा जोड़  दे  कि जो सामान्य क्या बांदरों म बि  भौत हीन छे।

  भगवान आनंद भवन म विचारणा  छा कि अब मनिख  वो कार्य कारल वो सभ्यता उतपन्न कारल  जांक कल्पना भगवान न कौर छे।  कई मैना ह्वे  गे छा भगवान आनंद की नींद म लग्न छा।

    एक दिन सुबेर ना अदा  रात म महर्षि नारद न जोर जोर से खड़ताल अर वीणा  बजैक सरा आनंद लोक म हल्ला मचै दे।  शेष क्वी हूंदो तो भगवान श्राप दे दींदा कि इथगा आनंद माय नींद म विघ्न डाळ  दे।  किन्तु नारद तै श्राप नि दे सकद छा।  एक नारद ही च जो भगवान विरुद्ध की पूरी सूचना भगवान तेन दींद छा निथर दिबता तो चमचागिरी क या अपर स्वार्थ हित की ही सूचना दींद छा।  भौत दै इंद्र न भगवान की गद्दी छिनणो  हेतु कुटिल रणनीति रची तो दिबतौं न क्वी सूचना नि  दे पर नारद न समय पर इन्द्र क करतूत की जानकारी देक भगवान तै भगवान रण लैक  राख।

    भगवान चिर आनंद क दिसाण -खंतुड़  छोड़ि  भैर  उख ऐन  जखम आंदोलन कारी या विरोधी धरना दींदन।

   भगवान चतुरता से नारद तैं  धरना स्थल से लेकि अपर गुप्त कक्ष म लीगेन जख की  सूचना कबि बि कै बि दिबता तैं नि  मील सकद छे।

   भगवान न पूछ , “यीं  रात म ? ‘

  नारद जीन उत्तर दे , ”  बस बात ही उन  च “

भगवान न पूछ < ,” क्या ?

उत्तर दीणों स्थान पर नारद जीन पूछ , ”  जब मनिखों न पशिवत ही व्यवहार करण  छौ तो मनिख निर्माण की क्या आवश्यकता पोड़ प्रभु ?”

 भगवान न उत्तर म ब्वाल , ” इन  कन  बुलणू छे तू ?”

  नारद जीन ब्वाल , ” हां  मनिख तो बिलकुल पशुवत व्यवहार करणा छन। “

   ” इन  कन  ह्वे सकद ? मन अर  बुद्धि अतिरिक्त गुण  मनिखों तैं दिए गेन कि  वो एक रचित सभ्यता निर्माण कार साकन जो गोरिल्ला, बांदर बि निर्माण नि कौर सकदन। ” भगवान न तर्क म खीजीक ब्वाल।

  नारद न बोलि , ” जब निर्माता अपर  निर्माण कौरि  फकोरि से जा तो यू ही हूंद।  “

  भगवान  न वास्तव म भगवान न मनिख निर्माण उपरान्त पृथ्वी जिना झांक बि नि  छौ तो अफ़ु पर क्रोधित ह्वेक भगवान न नर्ड जी से पूछ, ” कनो मनुष्य नई नई सुविधा निर्माण नी  करणु।  क्या मनिख  घर, भोजन , निवास गृह अर औषधि निर्माण नी  करणु च ?”

नारद जीन बताई कि मनुष्य बिलकुल थोड़ा सब्य बांदर जन व्यवहार करणु च बस।  उनी खुले म रौंद।  वन  भोजन पर ही निर्भर च।  वैन  क्वी बि उपकरण नि निर्माण कार जो सुविधा  को निर्माण कार साक।  भोजन मिल गे  तो ठीक निथर भुकि मोर जांदन।  “

   ” क्या पुरुष नारी प्राप्ति हेतु युद्ध नि  करदो ? ” भगवान को प्रश्न छौ।

   नारद को उत्तर छौ , ” केक युद्ध।  यदि क्वी दुसर पुरुष कै पुरुष से स्त्री ल्ही बि गे तो पुरुष पर क्वी प्रभाव नि पोड़द। “

    “क्या एक स्त्री दुसर  स्त्री सुंदर दिखेणो हेतु श्रृंगार नि करदी ?” भगवान को प्रश्न छौ।

   ” ना ना ” नॉर्ड को उत्तर छौ।

   “क्या मनिखों म अपर क्षेत्र , अपर भूमि हेतु युद्ध , द्वन्द नि  हूंद ?’ भगवान को हैक प्रश्न छौ।

 नारद जीन ना म मुंड  हलायी।

   ” अर्थात मनुष्य आपस  म ईर्ष्या , जलन , प्रतियोगिता , मीम अधिक हो , दुसर हीन  हो  की  भावना से कार्य नि करदन ? भगवान न पुनः प्रश्न कार।

  नारद जीक उत्तर छौ , बिलकुल ना मनिख तो प्रतियोगिता हीन च।  इन अभिलाषा हीन  तो मी बि  नि  छौं। “

   भगवान न पुनः पूछ , ” अर्थात दुसर  तैं जळाणो  बान कुछ बि  नई रचना नि करदो ?”

   नारद न ब्वाल , ” हां प्रभो।  मनिख तो अति उदासीन च भौतिक सुखों , भौतिक सुविधाओं क प्रति। “

भगवान न कुछ समय आँख बंद कौरि  विचार कार।  कुछ समय उपरान्त भगवान चिलैन , ” ये मेरी ब्वे ! मीन मनुष्य म मन अर  बुद्धि तो डाळ दे किंतु अहम, अभिमान , घमंड , गरूर  या अंहकार डळण  बिसर  ग्यों।

    भगवान न कुछ मंत्र बुलेन।  अर नारद से ब्वाल , ” एक माह उपरान्त मि  तै भूमि क सूचना दे। “

XXX

नारद जी एक माह म भगवान क अंतर्कोठरी म छा अर भगवान जी तै सूचना /प्रतिवेदन करणा  छा , ” प्रभु अब तो मनिख ईर्ष्या , जलन, घमंड  से भरपूर च भाई भाई क अधिकार छिनणु च , भाई भाई तै जळाणो  हेतु नया , नया अस्त्र शास्त्र ,  नया मकान निर्माण करणु च , दुसर  तै दिखाणो अर  जळाणो हेतु  नया नया भोजन  पकांदु अर  नई नई औषधि ,  नई नई कला-तकनीक खोज व   निर्माण म व्यस्त ह्वे  गे. प्रतियोगिता अब सब स्थलों म घुस गे।   “

   अब भगवान प्रसन्न ह्वेन  अर पुनः  आनंद कोठी म निद्रामय ह्वे गेन  कि अब मनुष्य स्वयं ही भगवान बणनो प्रयत्न्न म सभ्यता को विकास कारल।