वंसत अर्थात मेरी असफल प्रेम कथा 

  वसंत अर्थात  पुष्प, मतिहारी सुगंध अर  वसंत को अर्थ हूंद बल प्रेम म उमग , प्यार म उलार अर  प्रेमिका द्वारा पुनर्मिलन  को शत प्रतिशत  भरवस दीण ।  अर भरवस बि इन कि ब्वे बाबुं तैं क्या भाई बैणयूँ तैं बि धोका देकी मिलणो  वास्ता आली । मेरी  तबै  प्रेमिका न मिलन से पैलि संकेत दे दे छा कि  वा सरा परिवार दगड़ छल कौरी मिलणो  आणि  च।  तब मोबाइल , ईमेल कुछ नि  हूंदा छा किन्तु स्वयंमक रच्यां हस्त संकेत हूंदा छा कि  प्रेमी बींग जांद छौ कि प्रेमिका तै कख म कति  बजी मिलण। 

हम द्वी सही समय पर तत्परता से मिलां। वसंत ऋतु अपर  ऊंचाई या  चुप्पा म छई।  वंसत की रंगत से , निकट का बनि बनि लाल , पीला , नीला , बैंगनी फूलों की मदहोश  करदार सुगंध से हम द्वी प्रेमी अलमस्त हूँणा छा अर मस्ती म हम द्वी एक हैंक तै अव्यवहारिक , असंभव प्रोमीस करण लग गे छा।  प्रेमिका अगला जनम म बि मेरी प्रेमिका हूणों भरवस दिलाणी छे तो मि सात जन्मों क सौं घटणु छौ।  फूलों  की सुगंध व मदमस्त करण वळ बयार हवा से बहकी बहकी प्रोमिस तो गिच से अफि झूठा प्रलाप आणा छा ।  इन नी कि मी इ झूठा सौं घटणु छौ  वा बि फूलों सुगंध व वसंत प्रभाव से मदमस्त हूणी छे अर में अधिक अव्यवहारिक  प्रोमिसेज करणी छे ।  मस्ती म मी बि अर वा बि एक पुष्प सूंगी  भ्युं  चुलणा छ।

  आज प्रेम मिलन अर्थात बनि  बनि  पुष्प  सूंगो व तौळ चुलै द्यावो।  कुछ देर मतवाला ह्वेक हम  दुयुंन कुजाण  कथगा पुष्प तोड़िन अर कुचल दिनी। वसंत जनित उन्मत अवस्था म  हम पुष्प तुड़न , पुष्प सुंगण  अर इन  वादा,  इन इन प्रतिज्ञा करणा  छा कि रति -कामदेव  बि शरमै  गे  होला।  हमर हृदय , मष्तिस्क व आँखों म वसंत का प्रभाव शीर्ष पर पौंचदो कि मि  तैं  छींकणो  दौरा पड़  गे।  ले छींक , दे छेंक , पतका  छींक ह्वे  गे।  मि  पछतावा म छौ कि  मीन असंभव प्रॉमिस /प्रतिज्ञा जि  कौर तो भगवान न अति  छेंक दे दे।  म्यार  नाक वा आंख लाल च्चकार ह्वे  गेन।  नाक म्यार  बार बार पुंछण  से अर  आँख कासु से।

  छींक पैथर  कासु म परिवर्तित ह्वे  गे अर  अंत म कासौ हुलरी  पर हुलरी।   प्रेमिका पर रंग से वसंती क रंग उतर  गे  अर अब वा मेरी छींकाछींक से बेहोश हूण वळ छे।  वी तै लग में पर छींकों मिर्गी ऐ  धौं।  अर कुछ देर उपरान्त वीं  प्रेमिका  पर बि  छींकाछींक शुरू ह्वे  गे।    जब दुयुं पर अथा  छींका छूंकी शुरू ह्वे  गे  तो कामदेव व रति देव भाजी गेन  अर करुण  रस क ब्वे  बाब  ऐ गेन तो हम तै डेर  जाणा  पोड़  गे।  हम ड्यार  आणो  तयारी म लग गेवां।  वा पैल  बस म घर गे  मि  कुछ समय उपरान्त घर औं।  मुहल्ला म मि  तैं  उदासी दिखे,  जबकि  पड़ोसी  खूब हंसणा  छा , बाटम छोरा ‘ फील द लव इन  द एयर ‘, आर यू  माय लव’  जन प्रेम गीत गाणा छा किंतु  मेरी जिकुड़ी म तो रंगुड़ पोड्युं  छौ।

रात भर छींका छोंकी म बीत।  दादी नानी या बोडी काकी क जो बि  उपाय बतायां  छया मीन अपनाइन किन्तु छेींक हीन  नि  ह्वेन।  सुबेर डा मित्रानंद  म ग्यों  तो भेद खुल बल  मे पर फ्लावर एलर्जी च जो जब बि  म्यार नाक म  कुछ विशेष पुष्पों परागगण  घुस तो मे पर एलर्जी अटैक आयी  जाल।  अर्थात मैं तैं  पुष्पों से दूर ही रौण  चयेंद व  डाक्टर न चेतावनी  दे कि   कुछ माटो  व सीमेंट से बि  एलर्जी ह्वे  सकद।  डाक्टर न तत्काल लाभार्थ कुछ औषधि दे  अर  जब  बि  एलर्जी क अटैक आवो तो क्या क्या औषधि खाणै  औषधि बि देन।

  मुहल्ला म सूचना प्रसारित ह्वे  गे में पर एलर्जी से छींका छुंका ह्वे  किन्तु  मेरी प्रेमिका पर भी छींका छूंकी  ह्वे, डा मित्रानंद न बोल बल हूंद च छींका  छूंकी  एक हैंक पर सौरद  च ।  प्रेमिका क ब्वे  बाब चतुर छा ऊंन  अपर बेटी दुसर  शहर ममा क इख  भेज दे।  बस तब बिटेन  म्यार ये प्रेम को एलर्जी को कारण अंत ह्वे।  भौत वर्षों उपरान्त एक ब्यौ म प्रेमिका मील तो अपर बच्चों तेन वींन म्यार  परिचय इन  दे , ” यी तुमर ममा  जी लगदन अर  यूं  से दूर ही रौण  यूं पर फ्लावर अर  डस्ट एलर्जी च।  ‘