दर्जी जौन जसपुर तैं प्रसिद्धि दिलै 

–

    जख तक मेरी स्मरणशक्ति को प्रश्न च , म्यार  अनुसार म चार टेलर /दर्जी ह्वेन – स्वर्गीय उदयराम आर्य , स्वर्गीय परमा नंद आर्य , स्वर्गीय रत्नमणि कुकरेती अर  मुंबई वासी श्री रामचंद्र जखमोला।  रतन  चचा  सिलोगी म दर्जी काम करदा  छा तो रामचंद्र चचा मुंबई म अर्थात यूं दुयुंन जसपुरा निर्यात म क्वी योगदान नि  दे।  जबकि  उदयराम जी अर  परमानंद जी को बड़ो योगदान  वस्त्र सिलणो सेवा निर्यात म च।  सेवा या वस्तु निर्यात सदा ही गाँव या  देस तैं  प्रसिद्धि व सम्पनता दिलांण  म सफल हूंदन।

    उदै  चचा अर परमा  दा  (स्वर्गीय उदयराम आर्य अर  परमा नंद आर्य ) अपर समय क प्रसिद्ध दर्जी छा अर  आस पास गाँवों का लोक दुयुं म सिलै  काम से जसपुर आणा  रौंद छा।

   द्वी टेलर सीधा , सरल व मधुर वाणी प्रकृति का छा व दुयुं क समंध गाँव वळो से व ग्राहकों से मधुर छा।

   द्वी एकी  उद्यम कार्यरत हूणों  उपरान्त बि दुयुंक एक हैंक से भल संबंध छा।

     जसपुर को सिलै -सेवा निर्यात व समृद्धि वृद्धि हेतु  स्वर्गीय उदयराम आर्य , स्वर्गीय परमा नंद आर्य दुयुं को नाम जसपुर म स्मरणीय रालो।