सुरजी को सपनो राजकुमार 

  सुरजी  क बुबा  जी तैं  पूरो विश्वास छौ कि  यु  तो सुरजी कुण  ना नि  ब्वालल। कृपण घर को छौ अर सुरजी क बुबा न वर दक्षिणा म अपर  दस नाळी पणचर भूमि दीणो  प्रस्ताव जि दे  छौ।  पर रैबार आइ  कि मरीं मक्खी देखिक चाय  तो नि पिए जांदी।  कुरूपता दस नाळी  भूमि से हार गे।

  सुरजी क ब्वे  तैं पूरो भरवस छौ कि यु सुरजी कुण ना नि  ब्वालल। नौनु वींक  दूरौ सगा सबंधी ही छौ अर  एक खुट से डूंडो छौ।  पर संबंधी क रैबार आयी बल रुपया डोला तो सोळआ वर्षैक  गोरी नि  मिल जाली ?

  अबै  दैं सुरजी  तैं , सुरजीक ब्वे बाब तैं  बि विश्वास छौ स्यु तो ना नि  ब्वालल।  स्यु  बि कुरूपता म सुरजी से पैथर ही छौ।  सुहाग रात क समय तैन चिमनी क उज्यळ  म सुरजी तैं हरकैक फरकैक द्याख अर सुरजी तैं  खटला से लमडैक चल गे अर  बोलि गे मि साधू बणनो हरिद्वार जाणु छौं।

   सुरजी क ब्वे जोर से किराई , : ले आज पुनः सुरजी न ब्यावक क्वी सुपिन देख होलु. जब बि निंदम  सुरजी ब्यावक सुपिन दिखदी खटला मंगन भ्यूं लमड जांदी “