श्रीपार्वती को त्याग

उत्तराखंड संबंधित पौराणिक पात्रों की कहानियां श्रृंखला
300  से बिंडी  मौलिक गढ़वळि कथा रचयिता  : भीष्म कुकरेती
पर्वतराज हिमाला पुत्री श्रीपार्वती शिवश्री  तैं पति रूप म प्राप्ति कुण तपस्या म लीन छे।  तपस्यांत म ब्रह्माश्री  न श्रीपार्वती तै आश्वासन दे कि  शिव अवश्य प्राप्त होलु .

      एक दिन श्रीपार्वती शिव चिंतन म ध्यानमग्न छे कि  तैं  तै एक बच्चा क क्रंदन  सुणै दे।  श्रीपार्वती नदी जिना गे तो पायी कि एक मगरमच्छ निगळण वाळ छौ।  जनि  मगरमच्छ बच्चा तै खैंचदो छौ बच्चा क क्रंदन बढ़ जांद छौ।  बड़ी हृदयविदारक घटना छे।  श्रीपार्वती न ग्राह से प्रार्थना कार कि बच्चा तैं छोड़ दे।  मगरमच्छ न ब्वाल , ” विधाता न मेरो भोजन कुण नियम बणयुं च कि छठां दिन जो भी आओ तै तै खै ले।  आज छठो दिन यु बालक मील। मि मिल्युं  भोजन नि छोड़ सकुद  “

श्रीउमा न ब्वाल , : मि  त्वे अपर सब पुण्य दींदो तू ये बच्चा तैं  छोड़ दे। “

ये सूणी मगरमच्छ शांत ह्वे अर तब ब्वाल , ” ठीक च यदि तुम अपर सब तपस्या मैं  दींदा  तो मि अपर भोजन छोड़ द्योलू।  “

  करुणामयी मां  न संकल्प ले अर अपर सब तपस्या मगरमच्छ तैं दे दे।  जनि दे तनि मगरमच्छ सूर्य जन चमकण मिसे गे।  मगरमच्छ न ब्वाल , देवी तुमर बुलण  से मि  बच्चा छोड़ दींदो।  तुम अपर तपस्या वापस ले ल्यावो।  “

  श्रीउमा  न तपस्या वापस लीणो ना बोल दे।

   श्रीपार्वती बच्चा लेकि आश्रम ऐ  अर बच्चा क देखभाल करण म व्यस्त ह्वे गे।  इथगा म शिवजी प्रकट ह्वेन अर बुलण लग गेन , ” देवी अब तपस्या की क्वी आवश्यकता नी।  कारण तेरी तपस्या तो मैं नदी म ही मिल गे छे. मि स्वयं मगरमच्छ रूप म छौ ।