“सड़क सुरक्षा”

सड़क मा चलण से पैलि
कुछ ध्यान धन जरुर जी,
नशा नींद अर तेज रफ्तार से
रौण कखी अब दूर जी……..

जीवन च वरदान प्रभु कु
जीवन सैंका-समाळा जी
सड़क मा चलण से पैलि
नियम देखा, परखा समझा जी…..

ओवर स्पीड़ नि रखण
गाड़ी रखण कंट्रोल मा
गाड़ी कु स्टेरिंग कबि भी,
घुमौण नी जी गोळ मा……

जीवन च वरदान प्रभु कु
जीवन सैंका-समाळा जी
खड़ि उकाळ, या निस उंद्यार हो
गियर देखी तै डाळा जी……

सड़क च खाली माना दूर तक
फिर भी कबि क्वी ए सकदु,
अफु त बचण पर हैका बचौणै
भारी जिम्मेदारी जी……

कलह कलेष अर गुस्सा रोष मा,
गाड़ी कबि नि भगौण जी
गाड्यूं कु जाम लगी लंगट्येर
अग्वाडि सुदि नि क्वच्योण जी….

जिंदंगी अनमोल च भारी
सुदि सैकंडों नि गवौण जी
देर-अबेर भले ह्वे जालि
धैर्य मा गाड़ी चलौण जी……

जीवन च वरदान प्रभु कु
जीवन सैंका-समाळा जी
वाहन गाड़ी मशीन यंत्र छिन
सोचि-समझी गाड़ी चलौण जी….

अचणक चलदा-चलदि कबि भी
झप्प ब्रेक नि लांण जी,
इंडिकेटर दीक सबसे पैलि
पैथर सनकांण जी……

सबसे जरूरी बात च या
पैलि नियम पढ़ा यातायात का
ट्रेफिक ड्यूटी खङा ह्वया जु
बाना हमारा दिन रात मा….

कागज पत्री पूरी राखा
गाड़ी का कागज साथ मा,
बेमतलब कबि सुदि ना अलझ्या
छोटि-मोटि झगड़े बात पर…..

जीवन च वरदान प्रभु कु
जीवन सैंका-समाळा जी
अंध्यारा मा चलण से पैलि
हेडलैट डिप्पर बाळा जी….

गाड़ी चलोंदि दौ सीट बैल्ट हो
मुबैल कंदूड़ नि लांण जी
नजर ध्यान एकाग्र रखण
ध्यान कतै नि भटकांण जी…..

चढ़ै पर चढ़दि गाड़ी मिलु त
झटपट सैड़ दी द्यौण जी
भारी वाहन एंबुलेंस हो
तेतै द्योण पैलि चांस जी…..

थोड़ा सरल अर सहज बणीं हम
घटना छोटी मोटी टाळि सकदा
कबि भी हमसे के पर ना लगु
ध्यान इथ्या त रखि सकदा…

जीवन च वरदान प्रभु कु
जीवन सैंका-समाळा जी
दुर्घटना कखि सड़क दिखेंदि
मदद मा अगने आवा जी……
—-@अश्विनी गौङ
अध्यापक विज्ञान राउमावि पालाकुराली
जनपद रूद्रप्रयाग उत्तराखंड