admin 
( चबोड्या ननि नाटिका )
(ननि ननि नाटिका श्रृंखला )
नौटंकी – भीष्म कुकरेती
–
(मि सुचणु छौ कि जन जब बि क्वी सतोष फल प्राप्त ह्वे जांद त हम बद्रीनाथ , ग्विल्ल , नागराजा मंदिर जौंदा। तन्नि कॉंग्रेस अध्यक्ष बरा नामौ अध्यक्ष बणनो उपरान्त राहुल गांधी तै मिलणो गे ह्वेला। मीन कल्पना कार बल राहुल व खड़गे मध्य क्या क्या वार्ता ह्वे ह्वेलि। वार्ता भारत जोड़ो समय कै सर्किट हॉउस म इ ह्वे होली )
राहुल गांधी (चेयर से उठणो उपक्रम ) – आ आ
खड़गे – सर जी मि अध्यक्ष कॉंग्रेसियों कुण छौं। मै तैं सिवा नि लगावो ।
राहुल गांधी – मेरी बुद्धि इथगा नि जयिं च कि मि कै कोन्ग्रेसी तैं सिवा लगौं।
खड़गे – हां गांध्यूं तैं शिव ….
राहुल गांधी – सत्य। अच्छा क्या बात च ?
खड़गे – मि तीन मुख्य बत्थों पर तुमर परामर्श व दिशा निर्देशन कुण आयूं छौं।
राहुल गांधी – ब्वालो।
खड़गे – वु गुजरात अर हिमाचल म चुनाव छन तो
राहुल गांधी – एक मिनट हां ! मि जरा फोन करदो कि म्यार कुत्ता कन च /
राहुल गांधी (फोन पर ) – हां ! सुदर्शन ! म्यार कुत्ता न पूंछ उठायी च कि ना ? ना अबि तक पूंच नि उठाई ? ये मेरी मादर ! (रुणफति भाव म )
खड़गे – सर जी ! क्वी गंभीर समस्या ?
राहुल गांधी – हाँ घर म म्यार कुत्ता न पूंच नि उठायी।
खड़गे – डाक्टर बुलाई च कि ना ?
राहुल गांधी – अरे हां। मि जरा घर म सुदर्शन तैं पुछद छौं कि डाक्टर बुलाई च कि ना ?
(राहुल गाँधी फोन म व्यस्त )
राहुल गांधी – ओहो यु कुत्ता क समस्या कारण मि बिसर ग्यों कि तुम क्यांकुण अयां छा ?
खड़गे – सर गुजरात व हिमाचल चुनाव
राहुल गांधी – अरे हां मि बिसर इ ग्यों कि रिसेप्सनिस्ट तैं चिकन सैंड विच का बारा म इंस्ट्र्कसन दीण छौ। जरा मि रिसेप्सनिस्ट तै समजांद छौं।
खड़गे – जी
राहुल गांधी (आतंरिक फोन से ) – हेलो रिसेप्सिनिष्ट ! म्यार चिकन सैंडविच क आदेश दे छौ। जरा इटालियन ओरिगोनो अर इटालियन थाइम बि डाळ देन हां। क्या ? यूं सीजनिंग वास्ता आप तै क्वी मनिख सांगली भिजण पोड़ल। हूं हूं . एक मिनट हां। मि आदेश दीन्दो छौ। (फोन पर हथ धरि ) खड़गे जी ?
खड़गे – इन करला सांगली कॉंग्रेस अध्यक्ष तै फोन कौरि क मंगाई द्योला।
राहुल गांधी – नै नै ! वैन अपर कार्यकर्ता लेकि आई जाण अर फिर पुछण हम कब चुनाव जितला। बड़ो एग्रेसिव च अर इन अध्यक्ष मै पसंद नीन जु बिंडी प्रश्न पूछन।
खड़गे – त सांगली कॉंग्रेस संगठन मंत्री से मगाई लींदा।
राहुल गांधी – ना ना यू बि अग्रेसिव इ च। (फोन से हथ हठाईक ) रिसेप्सिनिस्ट ! तुम कै तैं सांगली भ्याजो अर इटालियन सीजनिंग मगाई ल्यावो। हाँ हां।
खड़गे – जी यू भल च।
राहुल गांधी – हां तो तुम क्यांकुण अयां छा ?
खड़गे – जी गुजरात व हिमाचल चुनाव …
राहुल गांधी – हां गुजरात अर हिमाचल .. आजकल मै तै भारत जोड़ो का अतिरिक्त कुछ नि दिखेणु च। पर तुमर क्या प्रश्न छन
खड़गे – गुजरात म कै कै तैं स्टार प्रचारक …
राहुल गांधी – ओहो ! मि ये भारत जोड़ो का चक्कर म अपर स्वामिभक्त डॉगी तै इ बिसर जांदू। जरा मि घर म फोन से डौगी क समाचार लीन्दो कि डौगी न पूंच उठाई कि ना ?
राहुल गांधी (मोबाइल पर ) – सुदर्शन ! क्या ? अब डौगी पूच तो उठाण लग गे पर आँख झपकाण म सुस्ती दिखाणु च ? डाक्टर बुलणु च बल यु डौगी क सामन्य गुण हूंदन। ठीक च किंतु तुम डॉक्टर तै पुनः दिखावो अर द्याखौ कि डौगी आँख झपकाओ।
राहुल गांधी (खड़गे से ) – चमचा पळण सौंग हूंदन किन्तु डौगी पळण कट्ठण। है ना ?
खड़गे – जी जी
राहुल गांधी – अच्छा तुम क्यांकुण आयी छा ?
खड़गे – जी जी ! गुजरात …
राहुल गांधी – अरे अरे ! सौरी ! वो रिसेप्सनिस्ट से चिकन सैंड विच क बारा म कुछ ऑवर इंस्ट्रक्शन दीण बिसर ग्यों। मि जरा फोन करदो।
खड़गे – जी कारो कारो। गुजरात हिमाचल तो …
राहुल गांधी (इंटरनल फोन से ) – रिसेप्सनिस्ट ! मि राहुल गांधी छौं। अच्छा सांगली से ओरिगाना पौंच गे। गुड। वो कैच अप फ्रेंच ब्रैंड इ हूण चयेंद हां। क्या / फ्रेंच ब्रैंड कैच अप इख कखि नि मिल्दो ? तो ? ना ना इंडियन ब्रैंड ना बिलकुल ना। हां हां ! ठीक च ठीक च इटालियन ब्रैंड मुट्टी केचप चल जालो। अर चिकन सैंडविच जनि खड़गे जी द्वार पर होला तनि म्यार सैंडविच भितर भेज देन। मि चिकन सैंडविच का प्रति बड़ो संवेदन शील छौं तो स्प्रेड बि म्यार प्रिय ब्रैंड इ हूण चयेंद।
राहुल गांधी (खड़गे से )- आप तैं त ज्ञान छैं इ च कि मि तैं ब्रेकफ़ास्ट म चिकन सैंड विच , लंच म मशरूम रिसोटो अर लुसिआना सलाद विद पेस्टो सॉस अर डिनर म एंटीपास्टो , सेकंडो मील पसंद करदो। खड़गे – जी जी पता च। आप नॉन फैटी भोजन पसंद करदा।
राहुल गांधी – किन्तु भोजन का ब्रैंडेड इंग्रीडियन्ट हूण इ चयेंदन ।
खड़गे – जी जी पता च। मै मैडम जी क भोजन पसंद बि पता च।
राहुल गांधी – हां तुम सरीखा कुलीग मिलण अच्काल कठिन च। एक वो गुलाम तै इ देख ल्यावो।
खड़गे -जी वैक छ्वीं नि कारो आपक मूड अभद्र ह्वे जालो।
राहुल गांधी – हाँ तो तुम ?
खड़गे – गुजरात , हिमाचल ..
राहुल गांधी – ओहो ओहो ! मि डौगी क विषय म पुनः पुछण बिसर ग्यों।
राहुल गांधी (मोबाइल पर ) – हां सुदर्शन ! अच्छा अब डौगी आँख बि झपकाण मिसे गे अर पूच बि हलाणु च। वेरी इनकरेजिंग इन्फोर्मेसन। क्या ? कंदूड़ हलाणै गति म हीनता आयी गे। अच्छा डॉक्टर न बोल याल कि यु डॉग म सामान्य गुण हूंदन। बस तू दस दस मिनट म सूचना दींद जा।
राहुल गांधी – क्या बोलुं खड़गे जी इतना कार्य हूंदन। प्रत्येक क्षण मि व्यस्त इ रौंद। तो आप ?
खड़गे – जी गुजरात , हिमाचल ..
राहुल गांधी (उछळिक ) – ये मेरी ब्वे ! मि तो बिसर इ गे छौ बल मीन गुजरात , हिमाचल चुनाव का रिजल्ट क समय विदेश यात्रा पर जाण।
खड़गे – पर भारत जोड़ो यात्रा ?
राहुल गांधी -ओहो ! हां भारत जोड़ो बि। पता नी ब्वे तैं पीके की या सलाह किलै पसंद आयी धौं। अनावश्यक फंस ग्यों मि। हां तो आप ?
खड़गे – गुजरात , हिमाचल …
राहुल गांधी (आंतरिक फोन आंदो , फोन उठांदन – हां हां ! खड़गे जी तैं दियूं समय समाप्त ह्वे गे। तुम सैंड विच भेज सकदा।
खड़गे – अर ऊ गुजरात , हिमाचल चुनाव ?
राहुल गांधी – चिंता नि कारो मीन मधुसूदन मिस्त्री क ड्राइवर व द्वारपाल से व आनंद शर्मा क किचन मेड से बात कौर याल। यूंको बुलण च बल यूं द्वी राज्यों म कै बि स्थिति व दशा म कॉंग्रेस चुनाव नि जीत सकदा। तो इन करला कि द्वी राज्यों क चुनाव उपरान्त आप म्यार सेक्रेटरी से समय ले लेन पूरी गंभीरता से चर्चा करला।
खड़गे – पर चुनावी रणनीति तो बणाण इ पोड़ल कि ना ?
राहुल गांधी – तो ठीक च आप आज दिल्ली जाणा इ छन तो भोळ म्यार सक्युरिटी मैन अर ड्राइवर से कन्सल्ट कौर ल्यावो। द्वी चतुर छन। ल्या आपक समय बि समाप्त ह्वे अर म्यार चिकन सैंडविच बि ऐ गे।
