admin 
–बाखरि—
।*बिचारि बाखरि*
मेंऽ मेंऽ कनी छे स्या,
जूड़ि परं बंधीं ।
पूछ्या गै –
क्य करि यींन जु
सजा मा पड़ीं।
खुशि मा बंधरु च बोनू,
मेरु नौनु ह्वे फौज मा भरति।
बलि मैन यींकि दीक,
माँ दुर्गा मैन खुश कनि।
अरे!खुशि त्वेतैं मिलि,
जान तु बाखरे च ल्यौणू?
मासु खाणे तेरि मरजि,
बानु दुर्गा पर च लगौणू!
हे मनखि!छौड़ यना धंधा,
किलै कनू तु काम गंदा?
खुशि मा तु हंत्या ना कर,
सबु मा परमात्मा कु अंश।
हम सबि यूंतैं यनि मारला,त
कनकै चललू यूंकु बंश?
बंधरा छोड़ि दे ते काज,
बाखरि तैं करि दे आजाद।
देवि -द्यवता तबै खुश रौला,
जब हम सबुतैं ज्यूंण द्यूला।
बदलि दे अपडु विचार,
ज्यूंण च सबूकु अधिकार।
ज्यूंण च सबूकु अधिकार!
—-डा0 गीता नौटियाल बैनोली भरदार रूद्रप्रयाग
