admin 
‘ कोरी बथ’
लूक्यां मूसौं फौज
फिर से दिखेणी च
भट्या-भट दिनमान
रात दिन ह्वईं च।
गौं-गळयूं मा परचा
छप्यां छिन
चिफळा गिच्चा
आजकल रड्या छिन।
अरे दवे-दारु जुकाम बुखार
आजकल खूब पूछणां छिन
भेजी अबार उम्मीदवार
हमीं छा
बौडी ब्वनीं
मेरा बणै द्योला
त्वेतै उम्मीदवार
पैलि जु पांच साल बटिन खयूं
तेकु हैसाब बथो
तब उडो
चुनौ अर राजनीत्यू बथौ।
दवे-दारू जुकाम बुखार
आंदा-जांदि रौण
अपड़ि वोटे तागत
मै भी पछांणग्यूं
तुमारि कोरी बथौं मा
अब नी अलझ्यूं।
सिमरन रिंगेड भरदार रूद्रप्रयाग
