admin 
भीष्म कुकरेती
(सिलोगी वियालय समळौण )
– मि कक्षा सात म छौ। संभवतया 1963 -64 की। जेठ अंत म मुंगर्यात आण से पैल सिलोगी क छात्रों क आंतरिक परीक्षाफल पोस्ट से ऐ जांद छौ। मि तैं जिंदगी म कबि बि परीक्षाफल की चिंता नि हूंद छे। चिंता बडा जी तैं हूंदी छे कि मि टॉप आयी छौं कि ना।
पोस्ट मैन ठंठोली का बिहारी लाल बडोला जी ग्वील पोस्ट ऑफिस से बड़ेथ हूंद जसपुर ऐ गे छा अर जसपुरा क छात्रों रिजल्ट दे गे छा। सभी छात्र पटवारी जीक घर म जमा छा तो बिहारी लाल जीन एक एक कोरी सब तैं रिजल्ट दे दे। अर म्यार रिजल्ट देखि सरा गाँव म हल्ला ह्वे गे। जु नि बि समजद छा वी बि बुना कि छात्र हो तो भीषम जन जु 50 मदे 55 नंबर लांदो। म्यार रिजल्ट म मि तैं गणित म 50 मदे 55 नंबर मिल्यां छा तो पुरो क्षेत्र म बात हूनी छे। कबि कैन नि सूणी छे।
म्यार बडा जी मास्टर जी (बलदेव प्रसाद जी ) तैं पैल आश्चर्य ह्वे पर फिर समज गेन कि 50 मदे 55 नंबर किलै मिलेन। परीक्षा म सब छात्र चिल्लाणा छा कि क्षा आठ क पेपर सात म ऐ गे। अर मीन सात प्रश्नों क उत्तर देकि सबसे पैलो पेज म अळग मोटा अक्षरों म लेखी दे छौ –
कोई भी पांच प्रश्न देख लीजिये –
कक्षा आठम दगड्या बुल्दा बि छा – कोई भी पांच प्रश्न देख लीजिये।
यु तो पता छौ कि गणित अध्यापक न ही 50 मदे 55 नंबर दे होला किन्तु कन यु पता नि चौल छौ।
भौत वर्षों पश्चात पोरू वर्ष रुड़की बिटेन प्रिय मोहन लाल बहुगुणा न एक नंबर दे कि सिलोगी का भूतपूर्व अध्यापक दिनेश काला जी तुम तैं याद करणा छा। मीन बात कार तो काला जी को सीधा बुलण छौ ते जन छात्र तैं भूलण कठिन च। तब काला जीन बताई कि प्रश्न अति कठिन छा अर मीन सब सात प्रश्न कोरी टीचर कुण ही कार्य दे दे छौ कि कोई से पांच प्रश्न देख लीजिये।
कला जीन 50 मदे 55 नंबर दे देन। किन्तु प्रिंसिपल साब जानकी प्रसाद कुकरेती जी व अन्य अध्यापकों न अवरोध करण ही छौ। नियम की बात तो सै छे। दिनेश काला जी न समजायी कि 55 नंबर आवश्यक छन कि मि कक्षा म टॉप रौं (कदाचित क्खी कै विषयम कम होवन तो )
प्रिंसिपल साब अर हौर अध्यापक मानी गेन। अर मेकुण यु यादगार क्षण च ,
काला जी खीमसिंग लाला जीक इख रौंदा छा ,
86 वर्षीय श्री दिनेश काला जमली लंगूर का छन। सिलोगी क बाद मिलिट्री म चल गेन। अब सेवा निवृत का बाद रुड़की म छन। काला जीक द्वी नौन अच्छी सर्विस म कार्यरत छन।
मि तैं दसियों अध्यापकों न पढ़ाई पर दिनेश काला जीक स्थान तो बड़ो ही च।
जुगराज रयां दिनेश जी काला जी BSC !
