admin 
(लघु नाटिका श्रृंखला )
–नौटंकीबाज – भीष्म कुकरेती
–
बॉस (इंटरव्यू लिंदेर )- अच्छा ! बथावा तुमम क्या क्या हुनर छन ?
अभ्यार्थी – यु तो प्रार्थना पत्र म लिख्युं च।
बॉस (इंटरव्यू लिंदेर )- मि तुमर मुखन सुणन चांदो।
अभ्यार्थी -हैं ? पर इन म त प्रार्थना पत्र अप्रासांगिक ह्वे जांद।
बॉस (इंटरव्यू लिंदेर )- न मि अपर कंदूड़ुंन सुणन चांदो। इथगा प्रार्थना पत्र पढ़णो मीम समय छह बि नी।
अभ्यार्थी – पर आप तैं क्या पता कि म्यार बुलणो समय तुमर पढ़ण से कम होलु ?
बॉस (इंटरव्यू लिंदेर )- यु कुछ सपधट नि ह्वे सकद।
अभ्यार्थी -हाँ मैं बि इनि लगद।
बॉस (इंटरव्यू लिंदेर )- अच्छा ! मान ल्यावो हमन तुम तैं नौकरी दि याल !
अभ्यार्थी – ओहो जुगराज रयां। मि तैं नौकरी बड़ी आवश्यकता बि छे। त मि भोळ बिटेन औलु।
बॉस (इंटरव्यू लिंदेर )- न्है न्है इन मान मतलब सोच।
अभ्यार्थी – अच्छा। पर सुचण या मनणो झंझट किलै करणा छा ? तुम बॉस छा अर तुमन उन बि बोल याल कि मि तैं सेलेक्ट ह्वे ग्यों।
बॉस (इंटरव्यू लिंदेर )- ना ना मीन बोलि मानो
अभ्यार्थी -क्या मानो ?
बॉस (इंटरव्यू लिंदेर )- मानो कि तुम तै नौकरी दिए गे।
अभ्यार्थी -कैन दे ?
बॉस (इंटरव्यू लिंदेर )- मीन और कैन !
अभ्यार्थी – चलो मि मानि ग्यों बल आपन में नौकरी पर रख आल।
बॉस (इंटरव्यू लिंदेर ) – तुम कुछ कम म तैयार ह्वे जैली ?
अभ्यार्थी – ओके मि कम म तयार
बॉस (इंटरव्यू लिंदेर )-फिर त इन म हम तुम तैं नौकरी नि दे सकदा।
अभ्यार्थी – यां पर मि तैं अल्प या बिंडी म किलै त्यार होंऊं। यु त शोषण ह्वे कि ना ?
बॉस (इंटरव्यू लिंदेर )- पर मैं लगद तुमर योग्यता उथगा नी जथगा कि वेतन च।
अभ्यार्थी – पर मीन अपर योग्यता या हुनर का बारा म तो बथायी नी अबि तक।
बॉस ( इंटरव्यू लिंदेर )- मीन प्रार्थना पत्र म पैलि बांचि याल छौ।
अभ्यार्थी -पर पैल त तुमन बोलि छौ बल आपन मेरो प्रार्थना पत्र नि बांच।
बॉस (इंटरव्यू लिंदेर )- मि तुमर संवाद व संचार शक्ति पछ्याणन चाणो छौ। मि सब सुणणु रौं।
अभ्यार्थी – त अब मनण बंद कर द्यूं ?
बॉस (इंटरव्यू लिंदेर )- हां
अभ्यार्थी -अब ?
बॉस (इंटरव्यू लिंदेर )- जा।
अभ्यार्थी –
बॉस (इंटरव्यू लिंदेर )-
अभ्यार्थी – यदि मि मनण इ रौलु त क्या होलु ?
बॉस (इंटरव्यू लिंदेर )- जा भै ये कक्ष से भैर ह्वे जावो।
अभ्यार्थी – ना ना जब तक आप मि तैं आजीविका नि देलि मीन नि जाण।
बॉस (इंटरव्यू लिंदेर )- मि त्वै तैं आजीविका नि दे सकुद।
अभ्यार्थी – न्है जब तलक आप आजीविका नि देल्या तो मि …
बॉस (इंटरव्यू लिंदेर )- तुम भैर जावो। निथर मीन सक्युरिटी बुलाण हां।
अभ्यार्थी – सेक्युरिटी क आवश्यकता नी। मि आपक दगड़ पूरो सुरक्षित छौं।
बॉस (इंटरव्यू लिंदेर )- यार त्यार दगड़ डील करण असंभव च।
अभ्यार्थी -हाँ। म्यार वेतन वृद्धि कारो।
बॉस (इंटरव्यू लिंदेर )- चल तुम तै आजीविका दिए गे। आज से तू हमर कम्पनी क प्रबंधक छे अबि बिटेन। . अबि …
–
सर्वाधिकार @ २०२२
बीकेयूनिवर्स श्रृंखला
