हनुमानै द्रोणगिरि यात्रा 

  रामायण काल महाभारत काल से भौत  युग अगनै को काल च।  अनुमान लगै सक्यांद  कि लगभग तीन सहस्त्र वर्षों से पैल बि  गढ़वाळ  चिकित्सा पर्यटन म नामी क्षेत्र छौ।  हिमाला की कुछ जड़ी बूटी  केवल हमला या हिमाला म विशेष स्थानों म ही जन्मदी।  ऊं  जड़ी बूटी प्राप्ति हेतु भारतौ भौं भौं क्षेत्रों से लोगों तेन गढ़वाळ  यात्रा आवश्यक छे।

 चूँकि रामायण कथा को क्षेत्र विंध्याचल से दक्षिम को च तो रामायण म हिमालय को वर्णन न को बरोबर  च केवल एक प्रसंग म हिमालय को महत्वपूर्ण वर्णन च।

    रामचंद्र जी तेन दशरत -कैकयी वरदान क अंतर्गत चौदह वर्षो कुण वनवास जाण छौ।  तो राम पत्नी सीता जी व भुला लक्ष्मण बि वनवास जाणो उद्यत ह्वे गेन।   घुमद घुमद तिनि नासिक जिना  ऐ गेन।  पंचवटी म तौन झोपड़े निर्मित कार।  तिनि आनंद से दिन बिताणा  छा कि लंकाधिपति रावण की बैणी शूर्पणखा तना  ऐ अर  सया लक्ष्मण पर आकर्षित ह्वे  गे।  शूर्पणखा न विवाह आग्रह कार जो लक्ष्मण न नकार दे।  शूर्पणखा सीता तैं  भयभीत करण लग गे तो लक्ष्मण न शूर्पणखा क नाक तीर से बेद दे।

  शूर्पणखा अपर भै म याचना लेकि गे।  याचना म तैंन सीता सौंदर्य क बड़ो वर्णन कर दे तो लंका धिपति रावण  सीता पर रीझ गे।  रावण सीता चोरी ल्है गे।  राम लक्ष्मण तै सीता खोज म सुग्रीव व हनुमान मिलेन।  राम न सुग्रीव क भैजि बाली मार तो सुग्रीव अर बानर सेना हनुमान सहित राम क दगड़ ह्वे गेन

.    राम रावण युद्ध म एक दिन रावण पुत्र मेघनाद अर  लक्ष्मण क भयंकर युद्ध ह्वे।  मेघनाद न लक्ष्मण पर दिव्यशक्ति चलै दे अर लक्ष्मण मूर्छित ह्वे गेन।  लक्ष्मण तै शिविर म लये  गे।  आयुर्वेदाचार्य सुषैण  ऐन तौन लक्ष्मण की नाड़ी द्याख अर तुरंत संजीवनी बूटी लाणो परामर्श दे जो सुबेर से पैल आण आवश्यक छौ।

  आयुर्वेदाचार्य सुषैण न बताई  कि संजीवनी बूटी  उत्तर दिशा म मध्य हिमालय म चमोली क निकट द्रोणागिरी पर्वत म ही मिलदी अर या बूटी कुछ विशेष ढंग से राज म जगमग चमकदी  किंतु  बुर्या खौड़ क जड़ से अलग च।

    राम दल म केवल पवन पुत्र हनुमान ही वायु गति से बिन विमान का उड़ सकद छा तो हनुमान तैं द्रोणागिरी भिजे गे।  रातौ समय छौ जब हनुमान द्रोणागिरी म पोँछिन। रात म द्रोणागिरी पर्वत म बुग्याळ – ही बुग्याल छे अर सरा पर्वत म भौत सा पौधा जगमग चमकणा छा।  हनुमान तै समज म नि  आयी कि यूं चमकद  पौधों म संजीवनी पौधा को च।  तो हनुमान पूरा पर्वत अर्थात द्रोणागिरी पर्वत उठैक ल्है क युद्ध क शिविर ऐ।

   योगाचार्य सुषैण न संजीवनी खोज अर संजीवनी क आरक लक्ष्मण तैं पिलाई अर लक्ष्मण झठ से उठ गेन।