जा ! तू अबि आत्म हत्त्या कौर ले 

  चबोड़ाकार्य – भीष्म कुकरेती 

  एक  शहर म एक नगरपालिका सदस्य सियुं  छौ कि बारा बजे रात फोन आयी कि एक मनिख नगपालिका भवन का  छत बिटेन आत्महत्त्या करण वाळ च।  तुरंत आणो प्रार्धना छे।

   नगरपालिका सदस्य चौड़  घटनास्थल म ऐ गे।  वैन स्थिति द्याख अर तौळ बिटेन चिल्लाई , ” सुण  भुला तू कुद्दी नि  मार।  पैल मेरी बात सूण “

 छत बिटेन कुद्दी मरणो उद्यत हुयुंन ब्वाल , ” पूछो “

नगरपालिका सदस्य -ह्यां  तू आत्महत्त्या किलै करणु छै ?

कुद्दी कुण उद्यत मनिख –  ज़िंदा कैकुण  रौण ?

नगरपालिका सदस्य -तेरो परिवार होलु ब्वे बाब होला ?

कुद्दी कुण उद्यत मनिख – म्यार क्वी नी , ना ब्वे  ना बाब ना भाई बंध।

नगरपालिका सदस्य – ह्यां  पर दगड़्या  आदि तो होला ?

कुद्दी कुण उद्यत मनिख – ना ना ना म्यार क्वी दगड़्या  ना दगड़्याणी।

नगरपालिका सदस्य -तो ठीक च संभवतया हम दगड़्या बण सकदा।

कुद्दी कुण उद्यत मनिख – कनो ?

नगरपालिका सदस्य -तू राजनीति म विश्वास करदी  छे ?

कुद्दी कुण उद्यत मनिख –  हां।

नगरपालिका सदस्य -भलो भलो मी   वोटर बि  छौं अर  नेता बि ।  तू वोटर तो ह्वेलि ?

कुद्दी कुण उद्यत मनिख – हां

नगरपालिका सदस्य – अच्छा तो तीन म्युनिसिपल इलेक्शन म कैं पार्टी तैं  वोट दे ?

कुद्दी कुण उद्यत मनिख – मीम वोटर कार्ड च किन्तु मि  वोट दीणो कबि  नि जांद।

नगरपालिका सदस्य – तो अबि  कुद्दी मार अर कौर आत्म हत्त्या ।  ते वोट- निदिवा कारण सब गड़बड़ हूंद।

सर्वाधिकार @ भीष्म कुकरेती