admin 
खान पान अर पोषण मा
यु ध्यान धन पुरु जी।
संतुलित आहार हमारु
या बात भौत जरूर जी।
(भोजन का अवयव छिन पांच)
तागत अर तुरंत ऊर्जा
कार्बोहाइड्रेट दैंदा
मीठी चीजौ मा अन्न फसल मा
भरपूर कीटी तै रैंदा।
आलू ग्यूं अर चौळ भात मा
कोदा झंगोरा जौं का साथ मा
चीनी गुड या मीठी चीजों मा
कार्बोहाइड्रेट रळयू मिल्यू च।
(प्रोटीन-शरीर कु निर्माणतमक तत्व)
दाल चना राजमा छेमी
अरहर-तोर, गौत-मसूर
भट्ट, रैंस, काळीदाळ
दे-पनीर, च्यू-मशरूम
शरीर रचौण बणौण मा
प्रोटीन मिलदू यूमा भरपूर।।।
(वसा-संचित ऊर्जा श्रोत)
घर्या राडू घ्यू बादाम
घर्या तिलों कु तेल आम
वसा फैट चर्बी मा धर्दा
शरीर मा तागत जमा करि रखदा।।।
(विटामिन)
हरी भुज्जी या मौसमी फल
आम,अखौड़,किशमिश,तरबूज
संतरा-नींबू, नारंगी,आड़ू
विटामिन कु यौमा धारू,
रोग शरीर नजीक ना औ
स्वस्थ हौंसिया मुखडी रौ
विटामिन खांणौ मा ल्येंदि रा
हर दिन फल सब्जी खांदि जा।।।।
(खनिज लवण का काम अनेक)
रोग शक्ति तै बढौण मा
खांणौ तै पचौण मा
हड्डी मजबूत कन
शुद्ध स्वस्थ तन मन
धर्ती प्यौट माटा मा रैक
खनिज लवण का काम अनेक।
(खनिज तत्व-आयरन Fe)
आयरन खूनै कमी से बचौदू
लोखरै कढै मा खांणौ बणौण
हरी सब्जी कफलू ढेपलि
कोदै रोटी खांदी रौण।।।।।
(खनिज तत्व-कैल्सियम Ca)
खांणौ मा जु कैल्सियम ह्वो
शरीर मजबूत टकटकु रौ
दूध दै अंडा पनीर
हड्डी तै मजबूती द्यौ।।।।
(खनिज तत्व-आयोडीन I)
ल्वौण ह्वो आयोडीन वोलु
स्वस्थ ह्वो हर खांणो कोलु
घेंघा रोग कबि नि ह्वो
स्वस्थ हौंसिया शरीर रौ।।।।
खांणो प्यौणौ यन समृद्ध हो
जै मा पोषक तत्व मिल्यू रौ
कुपोषण की जकड से
सैरि कुटुम्बदरि मुक्त ह्वो।।।।।
——@अश्विनी गौड़ राजकीय उच्चतर माध्यमिक विद्यालय पालाकुराली रूद्रप्रयाग, उत्तराखंड ।।।।
