प्रसिद्ध भूवैज्ञानिक प्रो.दाराशा नौशेरवां वाडिया 

                     प्रो  दाराशा नौशेरवां वाडिया  को प्रयत्न से ही   हिमालयी भू विज्ञान संस्थान स्थापना ह्वे  जैक नाम आज च  वाडिया हिमालय भूविज्ञान संस्थान देहरादून ।

                 दाराशा नौशेरवां वाडिया को जन्म सूरत म 25 अक्टूबर 1883 कुण  ह्वे छौ।  डाक्टर दाराशा क बुबा जी ईस्ट इण्डिया कम्पनी कुण जल  पोत निर्माण करदा छा।  दराशा नौशेर वाडिया क भैजि एम् एन  वाडिया एक शिक्षाविद छा यूंक  प्रभाव से दारा को प्रेम विज्ञान से ह्वे ।  तौंकी  प्रारम्भिक शिक्षा गुजराती स्कूल म ह्वे अर पैथर अंग्रेजी स्कूल म।

 बारह वर्ष की आयु म शिक्षा हेतु सि  बड़ोदरा ऐन ,

बड़ोदरा म दाराशा न 1905 म विज्ञान , (प्रकृति विज्ञान , वंशपति विज्ञान ) से ब्रोडरा कॉलेज से स्नातक डिग्री प्राप्त कार।   कॉलेज क प्रिंसिपल डाक्टर अदार जी मसानी क प्रेरणा से दाराशा क झुकाव भूविज्ञान क जिना  ह्वे।  तब भूविज्ञान अपर प्रारम्भिक काल म ही छे।  स्नातक म बि  तौंन भूविज्ञान की पढ़ाई कार।

   स्नातक क उपरान्त कुछ समय हेतु दाराशा नौशेरवां वाडिया बड़ोदा कॉलेज म व्याख्याता रैन।

 बाद म 1906  म वाडिया की नियुक्ति प्रिंस ऑफ़ वेल्स कॉलेज  जम्मू म व्याख्याता क रूप म ह्वे।  जम्मू म वातावरण वाडिया अनुसार अन्वेषण हेतु छौ। कॉलेज म  भूविज्ञान क फैकल्टी व अन्वेषण प्रारम्भ करणो कार्य दिए गे।

  प्रोफेसर  वाडिया  की 1921 म भारतीय भूविज्ञान सर्वेक्षण क उप अधीक्षक पद पर नियुक्ति ह्वे। 1906 से 1921 तक  जम्मू म शिक्षक क रूप म वाडिया तैं  हिमालयी भूविज्ञान को अध्ययन करणो  पूरो अवसर मील।  भौत सा हिमालयी भूविज्ञान क ज्ञान प्राप्त कार।  19 19 म प्रोफेसर वाडिया की पुस्तक ‘जिओलॉजी ऑफ़ इंडिया ‘ (मैकमिलन पब ) प्रकाशित ह्वे।  यीं  खोजपूर्ण पुस्तक से प्रोफेसर वडिआ जग प्रसिद्ध ह्वे  गेन।

    भूविज्ञान सर्वेक्षण संस्थान म वाडिया तैं उत्तर पश्चिमी हिमालय क भूविज्ञान पर गहन खोज को अवसर मील।

   1938 तक प्रोफेसर वाडिया भारतीय भूविज्ञान सर्वेक्षण संस्थान से जुड्यां  रैन।  ये अवधि म तौन कति  हिमालयी भूविज्ञान अन्वेषण का पेपर प्रकाशित करिन  व जर्मनी ऑस्ट्रिया , चेकोस्लेविया देशों क यात्रा बि  कार।  उत्तर पश्चिम हिमालय की अक्ष संधि , नंगा पर्वत क भूवैज्ञानिक विषय पर जेनेवा कौंफिरेंस म प्रोफेसर वाडिया न पेपर पौध व तौंकी अंतराष्ट्रीय स्तर पर धाक म वृद्धि ह्वे।

    प्रोफेसर वाडिया 1938  को उपरान्त श्री लंका भिजे गेन जख तौं  तैं खनिज वैज्ञानिक क पद पर पदासीन करे  गे।  छह वर्ष तक सि श्रीलंका म रैन।

    1944  म प्रोफेसर वाडिया तै भारत सरकार क भूविज्ञान विभाग म सलाहकार नियुक्त करे  गे।

     भारत सरकार न 1949 म परमाणु खनिज प्रभाग की स्थापना कार अर प्रोफेसर दाराशा नौशेरवां वाडिया तैं निदेशक नियुक्त करे गेन।  मृत्यु पर्यन्त ( 15 जून 1969 )  प्रोफेसर वाडिया ये पद पर रैन।

    प्रोफेसर वाडिया तेन हिमालयी भूविज्ञान से भौत  प्रेम छौ।  प्रोफेसर वाडिया क पहल व प्रयास से हिमालयी भूविज्ञान संस्थान खुले गे।  बाद म ये नाम बडलिक वाडिया हिमालय भूविज्ञान संस्थान करे गे।

  हैदराबाद म भूविज्ञान संस्थान , गोवा म महासागर विज्ञान संस्थान खुलणो पहल बि प्रोफेसर वाडिया न करी छे।

रोयल जिओग्राफिकल सोसाइटी ( 1934 ) लंदन जियोलॉजिकल सोसाइटी ( 1945 ) न प्रोफेसर वाडिया तै पुरष्कृत कार।

 भारत म कतगा इ वैज्ञानिक संस्थानों न प्रोफेसर दाराशा नौशेरवां  वाडिया  तै सम्मानित  व पुरुष्कृत कार।

  भारत सरकार न प्रोफेसर बाडिया तेन पदम् भूषण  से सम्मानित कार।

भारत सरकार न  सम्मान म एक पोस्टल टिकट बि रिलीज कार।

भारत म भूविज्ञान क शोध की शुरुवात व शोध सिस्टम  तै संबल देणो  हेतु प्रत्येक भारतीय प्रोफेसर दाराशा नौशेरवां  वाडिया क ऋणी च।