भारत म गणित शोध जनक डाक्टर गणेश प्रसाद 

 डाक्टर गणेश प्रसाद महान गणितज्ञ छा।  डाक्टर गणेश प्रसाद विभव श्रृंखला, वास्तविक चर (Real  Variable )  सिद्धांत, फ्यूरियर श्रृंखला, सतग सिद्धांत (Surface ) म वैज्ञानिक अन्वेषण हेतु प्रसिद्ध ह्वेन।  डाक्टर गणेश प्रसाद आधुनिक भारत म गणित शोध जनक हेतु प्रसिद्ध छन व वनारस मैथिमैटिकल सोसिएटी क संस्थापक बि छा . उत्तर प्रदेश म शिक्षा प्रसार हेतु बि  डाक्टर गणेश प्रसाद क कार्य स्तुतिय च।

    डाक्टर गणेश प्रसाद को जन्म 15 नवंबर 1876  कुण बलिया (उत्तर प्रदेश ) म ह्वे  छौ।  आरम्भिक शिक्षा बलिया म ह्वे। मुईर कॉलेज  इलाहबाद से बीए करणों उपरान्त इलाहाबाद विश्व विद्यालय अर कोलकत्ता विश्व विद्यालय बिटेन तौंन एमए डिग्री प्राप्त कार व इलाहबाद यूनिवर्सिटी से डीएससी डिग्री प्राप्त कार।

   कुछ समय इलाहाबाद म अध्यापन क उपरान्त देकर गणेश प्रसाद कैम्ब्रिज चल गेन।  तख हौब्सन , फोसरठ सरीखा गणितज्ञों से सम्पर्क ह्वे अर गणित म शोध करण चयेंद की बड़ी इच्छा शुरू ह्वे।

 कुछ समय  उपरान्त डाक्टर गणेश प्रसाद गौटिंगेन  जर्मनी चल  गेन  जख  अर्नाल्ड सोमरफील्ड , हिल्बर्ट अर जॉर्ज कैंटर जन गणितज्ञों क सांध्य मील।

जर्मनी म गणेश प्रसाद न गणित म शोध का पेपर प्रकाशित कार जांकी गणित जगत म बड़ी प्रशंसा ह्वे।

   यूरोप यात्रा उपरान्त सि  इलाहाबाद ऐन मुइर सेंट्रल कॉलेज म गणित क प्रोफ़ेसर बणीन।  फिर कोलकत्ता विश्व विद्यालय म ताउम्र प्रोफेसर रैन अर मध्य म 1917 से 1923  तक बनारस  विश्व विद्यालय म बि प्रोफेसर रैन।

बनारस म बनारस गणित संघ तै संगठित करण म महत्ती भूमिका निभायी।

 गणित शोध पर वो भौत जोर दींदा छा।  गणेश प्रसाद न 11 पुस्तक अर  पचास से बिंडी शोध प्रकाशित करिन।

   वो आधारिक शिक्षा वा महिला अध्ययन का बड़ा पक्षपाती छा।  तौंन लड़कियों क शिक्षा प्रसारण  सहायता हेतु 22000 अर  आगरा विश्व विद्यालय म द्वी लाख रुपया दान बि  दे। इलाहबाद अर  बनारस विश्व विद्यालय तै बि दान दे छौ।

डाक्टर गणेश प्रसाद को स्वर्गवास 9  मार्च 1935  कुण  ह्वे।