बेटी

बेटी घौर की शान च
मान अर सम्मान च
जीवन की देंदार बेटी
ब्वे बुबा की शान च
बेटी त मान च.. बेटी से सम्मान च…

सैसुरा अर मैत मा
द्वी घौरो पछांण च
आंदा कु आदर अर
जांदा सद्भाव च

पढदि लिखदि जांणी बेटी
पैथर नि रांदि बेटी
लिखीपढी गुण गीत गै
खुशबू जन फैलांदि बेटी

खेल एथलेटिक्स मा
ग्यान अर विज्ञान मा
जगा जगो अग्वाडि खडी
शोध अनुसंधान मा…..

पर्वतों की चोटी बेटी
चुला पकोंदि रोटी बेटी
आगास उडान भरदि
हवै जाज चलोंदि बेटी…

कखि अंतरिक्ष यान मा
कखि धर्म कर्म बढौण मा
कलम पोथी हाथ पकडी
माला आखर गंठ्योण मा…

घर कुटुंब की रौनक
बेटी से ही ओंदि च
हैंसी खेली हौंस उलार
बेटी बसंत ल्योंदि च..

नव दुर्गा का नौ रुपों
जै घर पुजांदि बेटी
दुख बिपदा क्लेश मिटे
सुख समृद्धि ली ओंदि बेटी..

चौ दिशा कु जौ जस
भै बैण्यू पौछौंदि बेटी
दिशा धियांण जस समृद्धि
फरारु ध्वज घेंटेंदि बेटी

@अश्विनी गौङ अध्यापक विज्ञान
रा0उ0मा0वि0पालाकुराली रुद्रप्रयाग उत्तराखंड