admin 
(लघु नाटिका श्रृंखला )
नौटंकी – भीष्म कुकरेती
युवा राजनेता (हाथ जोड़ी भितर आंद ) – बॉस आपन भट्याइ ?
संसद म मुखिया नेता – हाँ। किन्तु त्वे तैं कुछ तमीज छह कि ना कि संसदीय मुखिया का सम्मान कन करे जांद ? याद च राज्य सभा की सीट इनि नि मिलदी।
युवा राजनेता (जल्दी जल्दी मुखियाक खुट पर हाथ रखिक ) – क्षमा बॉस ! बीच रस्ता म म्यार पार्टी म घोर विरोधी मिल गे छौ त तून लग गे छौ, मूड खराब ह्वे गे । तो आपक खुटम सिवा लगाणम देर ह्वे गे।
संसद म मुखिया नेता – अर सूण जब बि तू मैं भैर मिलवां त्वै तैं गंड गंड म्यार खुट म पोड़िक सिवा लगाण चयेंद। जांसे दुनिया तै पता चल जावो ..
युवा राजनेता – कि मि कथगा पार्टी भक्त छौं .
मुखिया नेता (चिंघाड़िक – नहीं! नहीं ! दुनिया तै पता चलण चयेंद कि मि ही संसद म पार्टी मुखिया छौं अर मेरी इथगा चलदी कि राज्य सभा लैक नेता बि म्यार खुटम मुंड धरदन।
युवा राजनेता – जी जी दुन्या समिण गंड गंड सिवा लगौल।
मुखिया नेता -हाँ लगद च तू राज्य सभा म शीघ्र ही …
युवा राजनेता – जी आपन भट्याइ ?
मुखिया नेता – मि त्यार कार्य से प्रसन्न नि छौं।
युवा राजनेता – सर जी क्या बुलणा छा? म्यार सरा परिवार आपक अंध भक्त छा. जी। मुहल्ला वळ तो मेरी पत्नी तैं चिरड़ांद छन कि हमर परिवार आपक चमचा न बिल्चा छंवां बिल्चा। में से क्या गलती ह्वे ?
मुखिया नेता –– ब्याळि ! टीवी डिबेट म म्यार उप नेता की बड़ी प्रशंसा कार ? कखिम बि म्यार नाम नि ले तीन ?
युवा राजनेता -पर सर जि ब्याळि उपनेट जी क जन्म दिन छौ तो टीवी म डिबेट ऊंको जन्म दिन पर छौ। तो प्रशंसा करण आवश्यक ही हूंद।
मुखिया नेता – हाँ तीन मिनट तीन बोलि उखम आठ बार उपनेता क नाम ले तीन अर चौदा विशेषण प्रयोग करिन।
युवा राजनेता (उहापोह म ) – जी जन्म दिन छौ ऊंक तो विशेषण प्रयोग
मुखिया नेता – त्वै तैं राजयसभा सीट मीन दिलाण कि उपनेता न ?
युवा राजनेता – यि बि बुलणै बात च। किन्तु सर जी ! उपनेता कु जन्म दिन छौ तो आपक नाम कनै लाण छौ ?
मुखिया नेता – अरे जब हम तैं टीवी डिबेट म पुछे जांद कि हमन क्या कार ? त हम कै प्रकार से उत्तर क स्थान पर विरोधी क मूछ पर आज लगाइ दींदा। अपर उत्तरदायित्व विरोधी क मुंड पर थोप दींदा कि ना ?
युवा राजनेता – जी जी बड़ी सफाई से हम अपर नाकामी क वास्ता विरोधी तैं उत्तरदायी सिद्ध कर दींदा।
मुखिया नेता –– तो उपनेता क जन्म दिन की डिबेट म तुम तैं एक केन प्रकारेण म्यार नाम लीण इ छौ।
युवा राजनेता – जी अगनै बिटेन ध्यान देलू कि कैक बि जन्म दिन या मरण दिन हो डिबेट म ें केन प्रकारेण आपक नाम अवश्य लीण।
मुखिया नेता – गुड गुड ! अच्छा परसी क डिबेट म हिटलर तेन तीन हिटलर जी हिटलर जी कौरि संबोधित कार ?
युवा राजनेता – जी मेरी ददि बुलदी छे बल दुश्मन तैं बि बढ़ हो तो जी जी कोरी भट्याओ .
मुखिया नेता – तेरी ददि ? कै युग की छे तेरी दादी ?
युवा राजनेता – जी ब्रिटिश युग …
मुखिया नेता – अर त्यार जन्म कब ह्वे ?
युवा राजनेता – जी कम्प्यूटर युग म
मुखिया नेता –– तो अबि बि ?
युवा राजनेता – पर सर जी आपन संसद म हिटलर तैं हिटलर जी हिटलर जी कोरी भट्याइ छौ। मैं याद च पूरो दस मिनट क भाषण म आपन आठ बार हिटलर जी बोली छौ।
मुखिया नेता – हाँ पर तैदिन संसद म विरोधी दलों न हमर भूतपूर्व प्रधान मंत्री तै हिटलर सिद्ध जि करि छौ , तो हिटलर तै सम्मान का वास्ता ….
युवा राजनेता – सर जी मि जरा कनफ्यूज छौ कि मीन हिटलर जी बोल तो ?
मुखिया नेता – हे अनाड्युं का अनाड़ी ! आजकल हम विरोधी दल का नेता तैं हिटलर सिद्ध करणा छा तो हम तैं अचकाल हिटलर की बेज्जती करण एक आवश्यकता च।
युवा राजनेता – औ ! पर मैं कैन हिंट नि दे कि अब हमकुण हिटलर असम्मानीय वस्तु ह्वे गे।
मुखिया नेता – आँख कान खोलि रखण इ त राजनेताओं वास्तविक कार्य च।
युवा राजनेता – जी (मुख पर कन्फ्यूजन )
मुखिया नेता –– त्यार मुख पर कन्फ्यूजन का चिन्ह ?
युवा राजनेता – जी कुछ ना। सुचणु छौ हर क्षण छद्म ही छद्म ?
मुखिया नेता –– बेटा ! राजनीती म तो . प्रति क्षण मुखौटा ही मुखौटा
