admin 
(लघु हास्य नाटिका श्रृंखला )
–
नौटंकीबाज – भीष्म कुकरेती
–
दांतु डाक्टर -हैलो क्या हाल छन ?
ग्राहक – वी हाल छन जु कुछ मैना पैल छा।
दांतु डाक्टर -भलो भलो। अच्छा प्रतिदिन , दांत ब्रश से साफ़ करदा छा कि ना ?
ग्राहक – दांत ?
डाक्टर – म्यार अर्थ च दांतुं टुपणा मतबल डेंटल कैप !
ग्राहक – हाँ मीन समज … सचेकि दांत। म्यार सब दांतों पर त टुपणा लगीं छन।
डाक्टर -हाँ वी साफ़ करदा छ कि ना ? प्रतिदिन ब्रश से ?
ग्राहक – तो इन पूछो रोज टुपणा ब्रश करदो छौ कि ना ?
डाक्टर -ओके ओके ! क्या तुम प्रतिदिन टुपणा ब्रश करदा कि ना ?
ग्राहक – यां पर सि त धातु क छन दांत कख छन /
डाक्टर -हां पर स्वच्छता तो हूणी चयेंद कि ना ?
ग्राहक – ह्यां पर धातु ? मेरी समज म नि आणु कि …
डाक्टर – अच्छा चलो! जरा जबड़ा खोलो दांत चेक करे जावन।
ग्राहक – एक हैंको दांत पर टुपणा ?
डाक्टर -तुम तैं कन पता ?
ग्राहक – जब बि मि आंद त या त दांत बदले जादान या दांत पर टुपणा लगद।
डाक्टर – ठीक च ठीक च। अब इन बताओ दांतौ टुपणा कै रंगक लगाण।
ग्राहक – म्यार हिसाब से चिट सफेद टुपणा।
डाक्टर -मि इन राय कबि नि देलु एक त चौड़ मटमैला ह्वे जालो अर बाकि दांत सफेद जि नीन तो …
ग्राहक – दांत ? क्यांक दांत ? मीम चार या बिंडी से बिंडी पांच दांत बच्यां होला। मि समज ग्यों इ वर्ष म्यार पांच दांत बदले जाल।
डाक्टर -हां पर सुरक्षित दांत याने सुरक्षित शरीर !
ग्राहक – सुरक्षित दांत ? मजाक नि कारो ! दांत कख रै जांदन।
डाक्टर -ओके ओके तुम नै दांतुं रंग बताओ।
ग्राहक – मतलब धातु क कलर ?
डाक्टर -यी विषय हम तक रण द्यावो कि नकली दांत या धातु क या कैल्सियम का हूंदन । तुम कलर ?
ग्राहक – सफेद चिट्ट सफेद।
डाक्टर – मेरी राय म यी भल नी।
ग्राहक – पर किलै ?
डाक्टर – ह्यां तुमर असली दांत खराब होला या ना।? किन्तु जु दांत दस वर्ष या आठ वर्ष पैल बदल छया वूंको तो रंग बिगड़ गे कि ना ? अब चिट्ट सफेद रंग का दांत लगैला तो सरा दाढ़ बदरंग नि दीखेलि ?
ग्राहक – मतलब ?
डाक्टर -मतलब अब तुमर असली दांत बदलण तो आवश्यक छन इ । किन्तु जु आर्टिफिसियल दांत आठ दस वर्ष पैल बदल छ्याई ऊंक बदलणो समय बि आई ही गे।
ग्राहक – अर्थात तुम मेरा पीछा ना छोड़ोगे ? इस जीवन में ?
डाक्टर – जी जी म्यार एक हथ तुमर जबड़ा म रालो अर हैंको हाथ तुमर खीसा उन्द। बस इथगा इ बात।
ग्राहक – कुछ तो शर्म कारो पिछ्ला दस वर्षों म मीन दवाईयों से अधिक दांत बदलण म खर्चा कार।
डाक्टर – भाग्यशाली छा। यु सब शक्तिशाली नया दांतों कमाल च।
ग्राहक – अर्थात अगला दस वर्ष बि तुमर डेंटल हॉस्पिटल …
डाक्टर – आज चेक कौर याल। इन कारो भैर रिसेप्सन म अगली चेक अप डेट बि ले ल्यावो अर फीस बि जमा कौर द्यावो। नया दांत क कलर बि तबि निर्णय ले ल्योला।
ग्राहक – हे भगवन !
डाक्टर – अच्छा एक प्रार्थना ! श्रीलंका आर्थिक सहयता का वास्ता कुछ दान बि रिसेप्सनिस्ट तैं दे दिन। हर बार क तरां दान की रसीद बि मिल जाली।
ग्राहक – दांत दिखाणो फीस क दगड़ दान बि दीण पोड़ल ?
डाक्टर – दियुं दान कभी खाली नि जांद। गुड बाई !
सर्वाधिकार @ भीष्म कुकरेती २०२२
