पर्यावरण वैज्ञानिक डाक्टर राकेश कुमार मैखुरी 

प्रेरक उत्तराखंड क   वैज्ञानिक जीवन व वैज्ञानिक शोध  कहानियां   श्रृंखला

    300   से बिंडी गढ़वळि कथा रचयिता  : भीष्म कुकरेती 

सामान्य जन  तो छ्वाड़ो  बुद्धिमानों तै समझाण कठिन हूंद कि जब तलक ऐकेडेमिक रिसर्च पर कार्य नि  होलु विकास हेतु आवश्यक अन्वेषण ह्वे इ  नि  सेकेंड।  डाक्टर मैखुरी तैं  उत्तराखंड व भारत म पर्यावरण पर अकादमिक अन्वेषण  व तौं  अन्वेषणों तै प्रयोगिक धरातल म उतारण म लाभ हेतु सदा याद करे जाला।  डाक्टर मैखुरी से प्रेरणा मिलदी कि कन एक ग्रामीण महान वैज्ञानिक की श्रेणी म ऐ सकदो

मार्किस व्हू इज व्हू अनुसार डाक्टर राकेश कुमार मैखुरी एक प्रसिद्ध पर्यावरण वैज्ञानिक अर  शोधकर्ता छन।

डाक्टर राकेश कुमार मैखुरी क जन्म २३ जुलाई 1962  कुण लंगासू, कर्णप्रयाग चमोली  गढ़वाळ  म ह्वे।   प्रारम्भिक शिक्षा गाँव व निकट ह्वे। हुन्यार छात्र  1983 म राकेश कुमार मैखुरी न हेमवती नंदन बहुगुणा गढ़वाल विश्व विद्यालय बिटेन बॉटनी म  एमएससी डिग्री प्रथम श्रेणी म  प्राप्त कार।  1987 म परिश्रमी राकेश कुमार मैखुरी न   नार्थईस्टर्न  हिल  यूनिवर्सिटी , शिलॉन्ग , मेघालय से बॉटनी म  पीएचडी उपाधि प्राप्त कार।  अन्वेषक डाक्टर  न जवाहर लाल नेहरू विश्व विद्यालय से  पोस्ट डॉक्टरेट उपाधि प्राप्त कार।

जनवरी 1991 म डाक्टर राकेश कुमार मैखुरी न गोविन्द बल्लभ पंत इंवायरॉन्मेंट संस्थान म अर गढ़वाल यूनिवर्सिटी म  पर्यार्णवादी अन्वेषक रूप म प्रवेश ले। डाक्टर राकेश कुमार न भौत सा पर्यावरण विज्ञान म वैज्ञानिक अन्वेषण कोरी  वैज्ञानिकों क ध्यान खींच।  इख  तक कि  साहित्यकार बि डाकर मैखुरी क अन्वेषण म रूचि अर परिश्रम की भूरी भूरी प्रशंसा करदन।

1  मई 2020 से हेमवती नंदन बहुगुणा यूनिवर्सिटी म सि  प्रोफेसर छन। डाक्टर मैखुरी गढ़वाल विश्वविद्यालय क पर्यावरण विभाग का अध्यक्ष व प्रोफेसर छन।

अब तक लगन का पका , धुन का पक्का , सहृदय डाक्टर राकेश कुमार मैखुरी न 460 से बिंडी  रिसर्च पेपर्स विभिन्न विज्ञान जौर्नलों म प्रकाशित करिन।  तौं मदे 120 क लगभग पेपर्स अंतर्राष्ट्रीय जॉर्नलों म प्रकाशित ह्वेन।

7 पुस्तक सहभागी वैज्ञानिकों दगड (सम्पादन या ) छप गेन

भौत सा अंततर्राष्ट्रीय अन्वेषण सेमिनारों म भागीदार रेन डाक्टर राकेश कुमार मैखुरी।

भौत सा पर्यावरण संस्थानों न फेलोशिप दे  अर  भौत सा संस्थानों न सदस्य्ता प्रदान कोरी सम्मानित कार।

डाक्टर मैखुरी तै भौत सा पुरूस्कार जन कि विशेष वैज्ञानिक पुरुस्कार , यंग साइंटिस्ट , एस ऐन मिश्रा पुरूस्कार , पर्यावरण पुरूस्कार , मिलेन (लगभग १२ से बिंडी )।

उत्तराखंड शासन से न बि 2005  पर्यावरण क्षेत्र म अप्रतिम कार्य हेतु डाक्टर राकेश कुमार मैखुरी तैं  पुरुस्कृत कार।

डाक्टर राकेश कुमार मैखुरी क अंतर्गत 19 वैज्ञानिकों तेन पीएचडी उपाधि मील तो लगभग 70 एमएससी छात्रों तै  रिसर्च  गाइड  बि  कार।

डाक्टर राकेश कुमार को कार्य भविष्य म पर्यावरण , जैव विविधता संरक्षण , पृथ्वी क्षरण रोक म लाभकारी छन।

प्रत्येक उत्तराखंडी तै प्रसिद्ध पर्यावरण वैज्ञानिक डाक्टर राकेश कुमार मैखुरी पर गर्व च।