बुडड़ी घुरणी किलै ह्वेली ? 

   शक्कु  जब बि  ड्राइवर क पैथरा क सीट म एक बुडड़ी  तै  दिखदी तो वींक  पुटुकुंद च्याळ  पड़ जावन।  बुडड़ी अगल बगल वळ मनिख तो शांत सा दिखेणा छा किंतु बुडड़ी ! शक्कु  तैं लगणु छौ बुडड़ी  शक्कु  तैं पछ्याणनो प्रयत्न करणी च।  वींन महेशा  म ब्वाल।  महेशा न  बुडड़ी  जिना झळका द्याख अर शक्कु  कुण  ब्वाल भय खाणै  क्वी बात नी।  महेशा तैं उल्टां बुडड़ी क  अगल -बगल म बैठ्यां मनिख जि भयभीत लगणा छा।  शक्कु अति चिंतित तो पैलि इ छे बुडड़ी  घुरण  से तैक जीव सुखण मिसे गे।

     दुगड्ड  आण  से पैल  बस रुक अर  द्वी पुलिस वळ  बस म चढ़िन।  शक्कु न द्याख कि  महेश अर बुडड़ी  द्वी और बैठ्यां  मनिखों क मुख क रक्त लुप्त ह्वे गे अर  मुख सफेद ह्वे  गे।  महेशा न मुख तौळ  कर दे।

   एक पुलिस वळ सरा बस क यात्रियों तै एक एक कौरि छौ चेक  दिखणु।  पुलिस वळन महेशा कुण इंगित कौरि ब्वाल , “मुख दिखा “

   अर जनि  महेशा न मुख दिखाई कि  पुलिस वळ चिल्लाई , ” सर महमूद मिल गे।  क्या नाम है तेरा ?”

महेशा क उत्तर छौ , “महेशा :”

“महेशा या महमूद ? दो दो शादी कर उधम सिंह नगर में बिठाई हैं।  तीसरी को भगा ले जा रहा है ? ये लड़की तू महमूद के साथ है। क्या च नाम ?” पुलिस वळ न ब्वाल।

  शक्कु क तो दुनिया ही पलट गे।  वा तो महेशा दगड़ भगणी छे किंतु यू तो महमूद निकळ।  पुलिस वळ न महेश तैं अड्याइ अर  दुसर पुलिस वळ ड्राइवरा पैथर क सीट म बुडड़ी  तैं  दिखणु  छौ।  बुडड़ी  घुरणी  छे किंतु बुडड़ी क आंख्युं  डिबळी  हिलणी -डुलणी  नि  छे।  पुलिस वळ न द्वी मनिखों तै अलग हूणो ब्वाल तो बुडड़ी गड़म लुढ़क  गे।

पुलिस वळ न ड्राइवर तै ब्वाल , ” मर्डर केस लगणु च।  बस दुगड्ड म पुलिस चौकी म रोक “

   दुयुं  मदे एकान  ब्वाल , ” केक मर्डर केस हमम प्रमाण पत्र च। “