मच्छरै कथा

क्या तुम तै ज्ञान च बल केवल मादा मच्छर ही कटदि अर  ल्वे पींदी ?

 भौत पैलै क छ्वीं छन।  वियतनामौ गां म टॉम एक पति अर वैकि कज्याण न्हाम रौंदि छे।  टॉम खेती करदो छौ तो पति रेशमौ कीड़ा पाळदि  छे।

टॉम बड़ो परिश्रमी छौ तो न्हान  तैं  जीवन म भोग विलास की अभिलाषी , आकांक्षी छे।

   एक दिन न्हान एकदम अस्वस्थ ह्वे गे अर टॉम तब खेतों म जयूं  छौ।  जब वो घर आयी तो तब तक न्हान मोर गे छे।  टॉम घुंड टेकि ईश्वर से प्रार्थना करण लग गे।  इथगा म आकाशवाणी ह्वे कि  वो न्हान क शव तैं समुद्र क मध्य एक पहाड़ी पर ले जाई।

 भौत दिनों क जात्रा उपरान्त  टॉम न्हान क शव लेकि तैं पहाड़ी पर ली पौंछ।  वैन तख फूलों क उपवन म शव तैं पडाळ दे। शिथिलता से वैक बुरु हाल छा।  वैक आँख बजेण इ  वळ  छौ कि एक सफेद दाढ़ी वळ , तारा सि चमकण वळ आँख वळ महापुरुष आयी।  तै महापुरुष न टॉम से ब्वाल ,” तू म्यार शिष्य बणी  शान्ति से ये हि स्थान म रौ” ।

 टॉम न चिंता बताई कि  वो अपर पत्नी बिन नि रै सकदु।

महापुरुष न पुळेक टॉम कुण  ब्वाल कि अपर अंगुळी काटि रक्त न्हान क शव पर चुंवै दे।  टॉम न उनि  कार।  जनि रक्त की बूँद न्हान क शव म पोड़िन कि न्हान  चड़म खड़  ह्वे गे।  इनम महापुरुष न न्हान  तैं चेतावनी दे कि यदि वा परिश्रमी नि बौणलि तो डंड भागी ह्वेलि।  अर इन बोलिक महापुरुष अंतर्धान ह्वे गे।

टॉम अर  न्हान  नाव म बैठि चलण लगिन।  बाट म एक गाँव म भोजन पदार्थ मूल्याणो  बान  टॉम नव से उतरिक गां जिना चल गे तो न्हान  नाव म इखुलि छे।  तबि तौंक नाव क बगल म एक धनी मनिखाक नाव आयी अर  वै धनी न न्हान  तै चाय पर निमंत्रित कार।  धनी क नाव म जैक  वीं चा पे।  तब धनी न न्हान क सुंदरता की बड़ैं  कार अर  ब्यौवक प्रस्ताव दे कि  वू  वीं तै महल म रानी जन राखल ।  न्हान क तो यू इ तो  सपना छा कि महल म रावो अर ढेरों सेवक होवन।  वा धनी मनिखाक दगड़  चल गे।

 जब टॉम सामग्री लेक बौड़ी आयी तो न्हान नव म नि छे।  नावक नाविक न बोल कि  वा तो धनी पुरुषक दगड़ चल गे।  टॉम क्रोधित ह्वे अर धनी क महल जिना चल गे।  तख  वो सेवकों से धनी पुरुष मिलणो प्रार्थना करण इ  वाळ छौ कि वैन  न्हान  तैं बागवान म द्याख।  न्हान चकित छे।  वींन टौम कुण  ब्वाल कि  वा महल म प्रसन्न च अर  वींन  टॉम दगड़ नि जाण।

टॉम न ब्वाल  बल वो वीं तैं लीणो  नि आयुं च अपितु वो तीन बूँद  रक्त की वापस लीणो आयुं च जो वैन न्हान क शव पर चुंवै  छौ।

   या बात सूणि  न्हान  प्रसन्न ह्वे  कि वापस नि  जाण अर  केवल  रक्त की तीन बूँद ही तो वापस दीण , वींन गुलाब क कांड अपर बांह पर पुडाइ अर रक्त बूंद  टॉम क हथ म चुवाण  लग गे , जनि  तिसर बूंद चुंवे कि  न्हान सिकुड़ण  लग गे अर  कुछ ही क्षणों म मछरी बण गे।  अब  वा मछरी टॉम क मुंड म चक्कर काटणी  छे जन बुल्यावो वा क्षमा मंगणी छे।

   धोखाधड़ी म मौत ही हूंद।