बगुला भगत का स्वांग ( ननि बाल नाटिका ) 

सब  –  बता बता ! हम सब  सहन कर  ल्योला।

बगुला (दुखी ध्वनि म)  –  त्रिकालदर्शी न भविष्य देख बल ये क्षेत्र म १२ वर्ष तक भयंकर सूखा पड़न वळ च।  तालाब , गदन , छोया सुकण  वळ  छन।  अर  सबसे विदारक बात या च बल यु तालब दस पांच दिन म सूख जालो।  ये तालाब म भौत बड़ी समस्या आण  वळ च।  सब सूक  जालो यु ताल।  हम सब मोर  जौंला।  सब मोर जाल।

कछुवा – यांक  समाधान क्या होलु ?

बगुला – जख समस्या हूंद  तखि  समाधान बि  हूंद।  मीन पशु हित  क कार्य करण शुरू कौर याल तो मी  इ पशुओं सायता करलु।

कछुवा – तुम हमर क्या सायता करला ?

गिगुड़   –  हम तैं  बताओ तुम कन  हमर सायता करिल्या ?

बगुला –   पहाड़ी पिछवाड़ी  एक हैंक अमर ताल च।  मि एक एक जलचर अर्थात माछ  तैं अपर पीठ म उठैक तै ताल म  लि  जौल अर इन म ये ताल क प्राणी  बच जाला।

कछुवा – पर ! किन्तु !

बगुला – हे प्रभु ! हे प्रभु ! सब का हित साधो ! हे प्रभु सबका हित  साधो ! मै  तैं  इथगा  शक्ति दे कि मि  सबक हित साध ल्यूं।

गिगुड़  व कछुवा –  उचित उचित।

सब – उचित उचित ! तुम एक एक कोरी प्रतिदिन एक मछली या जलचर तैं  ली जा अर दुसर ताल म छोड़ द्यावो।

सूत्रधार –  अर  तै दिन बिटेन  बगुला प्रतिदिन एक एक मछली लेक पहाड़ी पिछवाडी जिना लिजाव  अर तख एक बड़ी  पटाळ म मारिक खायी जाओ। कै तै बगुला क सन्यासी जन व्यवहार व बोल से पता इ  नि  चौल कि  बगुला क्या धूर्तता करणु च।  तैं  पटाळ म माछों हडकों  ढेर लग गे। हडकों  ढेर देखि एक दिन –

बगुला (हडकों  ढेर देखि )  –  हाहा  हा ! मूर्खों क हूंद  में सरीखा  धूर्त तैं  जीवन यापन की समस्या ? मूर्ख मेरी बात म बिन सोच का आयी गेन।  मूर्ख !

सूत्रधार –  कुछ दिनों उपरान्त।  एक दिन  एक गिगुड़  तैं उचमिच  लग कि बगुला वे तै  किलै  नि  लीग।

गिगुड़ -बगुला भगत श्री ! बगुला भगत श्री !

बगुला –  हां  बोल शिष्य गिगुड़ ! त्वे  क्या संकट च ?

गिगुड़ – कुछ ना।  सब तैं  त  तुम लिजाणा  छा।  म्यार अवसर कब आलो ?

बगुला – उचित च उचित च।  तू आज इ म्यार कंदा म बैठ अर  मि त्वे  बि  तै ताल म लिजांदु।  बैठ।

सूत्रधार –  गिगुड़  शीघ्रतया  बगुला क कांद  म बैठ गे अर  बगुला गिगुड़  तैं  बिठाइक  उड़ व वीं पटाळ  क निकट आयी।  जनि बगुला पटाळ क निकट आयी तनि गिगुड़ै दृष्टि हडकों ढेर पर पोड़। 

गिगुड़ – भगत श्री यी हडकों ढेर क्या च ?कैका छन ी हडका ?

बगुला – यी ऊं  मूर्ख माछों  क व जलचरों हडका  छन जु बिन सोचि  बिन समजि म्यार झूठ म अळ्जि  गेन।  मीन तौं  सब तैं खायी देन।

गिगुड़ -क्या ? तो तीन इ सब ?

बगुला – हां।   अब तेरी हडकी  बि  ये ढेर  म दिखयालि।

सूत्रधार – गिगुड़  डरण लग गे  किन्तु तभी वैकि   जीवन चेतना  जाग  अर  वैन  अपर पंजों से बगुला क गौळ दबायी अर  बगुला तैं  मार दे। जब गिगुड़ अपर ताल म आयी तो –

गिगुड़ – मि तैं  बड़ो दुःख च कि हम सब बगुला क धूर्त रणनीति म अळ्ज गेवां अर  हमर दसियों साथ्युं  न जीवन नष्ट कराई दे।  किन्तु मि पापी बगुला तैं मारिक ऐ ग्यों।

सब जलचर – जय हो गिगुड़  श्री की !

गिगुड़ –  सौं  घटो  हम तै कै  पर बिन सुच्यां  बिंग्यां  कैक भकलौण  म नि  आण

. सब – हम सब सौं  घटदा  कि बिन सुच्यां  बिंग्यां  कैक भकलौण  म नि  औला।