admin 
(लघु नाटिका श्रृंखला, Short Skits )
(प्रयत्न करे ग्यायी कि फ़ारसी उर्दू ईरानी शब्द नि होवन )
नौटंकी – भीष्म कुकरेती
(स्थल – गली क एक सड़क। पोस्ट ओफिस बॉक्स से चिन्हित मार्ग, सड़क म द्वी एक लोग चलणा -फिरणा छन ). धामा (सड़क म तनि घुमणि च। तैक गौळम सोनाक गुलबंद च )
श्यामा (समिण बिटेन आंदि . धामा क गौळ म गुलबंद देखि तड़तड़ी हूंद अर टक्क लगैक धामा तैं दिखणि रौंदी। )
धामा – बोल ! में से क्वी विशेष कार्य ? भौत टक्क लगैक दिखणि छे में जीना ?
श्यामा -ना ना क्वी विशेष कार्य त ना किन्तु यि पुछण छौ तुमन यु सोनाक गुलबन्ध कखन ले होलु ? आकर्षक अर भितर नौ हीरा की कनियां।
धामा -किलै ? क्या यु गुलबन्ध तुमर च ?
श्यामा – हाँ खौंळेणो बात च कि इनि गुलबंद म्यार बि छौ।
धामा – ओह ! फिर अब क्या ह्वे ?
श्यामा – एक वर्ष तक त मीम छौ किंतु फिर अचाणचक अंतर्धान ह्वे गे। मि भौत रुचिकर लगद छौ यु गुलबंद। मेरी रूचि यां पर च कि तुम तैं कखन मील यु आकर्षक गुलबंद ?
धामा – हां किन्तु जु मि नि बतौल त ?
श्यामा (भ्रमित ह्वेका ) – मि कुछ त कौर सकुद किन्तु पुनः मेरी इच्छा च जणनै कि तुमन यु गुलबंद कख बिटेन ले ?कख बिटेन बताण म त्वे क्वी हानि त ना न ? औ बींग ग्यों मि अच्छा …
धामा – मीन बोल जु मि नि बतौल तो ? तू में पर गुलबंद चोरी क भगार लगाणी छे ?
श्यामा – हैं नि बताणाइ त नि बता। पर गुलबंद उनी च जन मीम छौ। बस इन बता दे तीन कखन ले ?
धामा – तुम इ बतावदी कि तुमर यु गुलबंद कख हरच छौ ?
श्यामा – मि नयाणु छौ तो तबि …
धामा – एक बात बतादि जखन ले छौ तखन गुलबंद ले लेदी।
श्यामा (अपर मन म – मीन बि त यु गुलबंद चोरी करी छौ ) – वु वु यु गुलबंद मैं तैं म्यार भूतपूर्व प्रेमी न भेंट कौर छौ।
धामा (अपर मन म – वैदिन वे होटल म मीन इ होटल क सर्विस मैं की सहायता से चोरी कर छे। )- औ ! में पर भगार नई लगा. निथर तू समिण पुलिस स्टेशन म शिकायत कर दे।
श्यामा – देख मि तै पता च म्यार गुलबंद इनि छौ जख पर ९ हीरा कनि छा।
धामा – जा जा निथर मि पुलिस म जौल ..
श्यामा – अच्छा अच्छा मि जांदू छौ। (भागी जांदी )
